MELETÎ - Her çend ke serê erdlerzî ra 3 aşmî derbaz bibo zî rijnayîşê taxa Orenî ya Arganî ya Meletî sey xo ya. Cinîyê taxe bi îmkananê xo têkoşînê cuye danê û seba sozê viraştişê banî yê îqtîdarî zî reaksîyonê ‘Şima kefen nêda şima ban bidê’ mojna.

 

Tesîrê erdlerzo ke 6ê Sibate de merkezê ci Mereş bî de qewimîya û xeylê bajaran ser de tesîr viraşt hema sey roje yewine dewam keno. Cayê ke tewr zêde zirar dî ra yew zî taxa Orenî ya Arganî ya Meletîye bî. Taxe de hema zafaneyê xirban nêameyo wedaritiş û şar bi îmkananê xo têkoşînê cuye dano. Bi germbîyayîşê hewayî reyde cuye zehmetin bena û yê ke tewr zêde tesîr benî zî cinî ya.

 

‘Ma dewlete ra çîyêk nêdî’

 

Leyla Demîrogluye da zanayîş ke roja yewine ya erdlerzî de bi 70 kesî reyde keyeyêk ke nêameybî rijnayîş de ca bîyî û vat: “Ma bereqaya ke 20 ciwanî tede mendêne de ca bîyî. Ma 5 keyeyî na bereqaye de ca bîyî. Nika her kes vila bî. Ma 4 keyeyî mendî. Awe û werdê ma çinî bî. Ma kelepulanê tîya binê xirbe ra vet. Werdê ma yê zimistanî ke ma viraştbî seba ke cereyan çinî bî çop. Xele, girar, konserveyê ma heme wêran bî. Ez hema deynê konserveyan dana. No 3 aşmî yo tu problemêk ma nêameyo çareserkerdiş.”

 

‘Dewlete kewte derdê kursîya xo’

 

Leylaye bale ant probleman ser û vat: “Tuwalet û banyo hempar ê. Cinî zaf zehmetî ancenê. Kesê xerîbî zî yene şuxulnenê. Kênaya mi enfeksîyon girewt. Ma regl benê. Ped çin o. Di reyan ped ame dima ra nêame. Vistireyê mi zî enfeksîyon girewte. Ma tuwaletan de enfeksîyon gênê. Nika xeymeyî pêro boy danî. Keyeyê ma rijîya. Ma dewlete ra tu çîyêk nêdî. Dewlete kewte derdê kursîya xo. Ma xo asayîş de hîs nêkenê. Dewa ma de bi hezaran xerîbî estî. Ma înan nêşinasnenê. Ma persenê vanê xebatkar ê. Bi şewe yenê nê cayan. Çi karê înan bi şewe esto. Dewlete eşkena nê çîyî bida vindertiş. Asayîşê ma çin o.” 

 

‘Dewlete kefen nêda do ban viraza?’

 

Cinîya bi nameye Gulfîruz Acare zî ercnayîşê xo wina ard ziwan: “Erdlerzî de keyeyê ma rijîya. Ma mecbur mendê keyeyê cîrananê xo de bimanî. Mi emserr bi şertê zehmetinan xo rê keye viraştbî. La rijîya. Ma rezil bîyî. No 3 aşme yo tu çîyêk çareser nêbîyo. Seba weçînayîşî yenê. La wa nêrî. Sere de Kiliçdaroglu vat ez qezenc bikera ez do 6 aşme de keyeyan viraza. La nika vanê yew serre. Dewlete kefen nêda acaba do awanîyan senî viraza?”