QERS - Qers seba mîtîngo ke do siba bêro viraştene hadre yo. Namzeda Partîya Çep a Keske Gulcan Alpe seba mîtîngî veng kerd û vat ke binê banê Partîya Çep a Keske de bêrêne têhet.

 

Xebata weçînayîşî bêmabên dewam kena. Partîya Çep a Keske çêarçeweya xebata weçînayîşî de ziyaret, pêvînayîş û heto bîn de mîtîngan pê ana. Mîtîngê Qersî 8ê Gulane de yo.

 

Namzeda Partîya Çep a Keske ya Qersî Gulcan Alp û hemsereka Partîya Demokratîke ya Şaran (HDP) Hacer Karataşe şarî dawetê mîtîngî kerd.

 

Seba mîtîngê girdi veng

 

Gulcane qiseykerdişê xo de wina bale nat mîtîngî ser: “Ma vanê ke ma vera bêhuqûqîye, bêedalet, bêusûlî û feqîrîye de raya xo bişuxulnê. Ma binê banê Partîya Çep a Keske de arê bibê. Ma bibî yew û bibedilnê. 8ê Gulane saete 11.00î de Raşteyê Cumhurîyetî de bi tewrbîyayîşê hemsereka pêroyî ya HDPyî Pervîn Buldan û hemserekê pêroyî yê DBPyî Keskîn Bayindirî ma do mîtîng pê bîyarê. Ma heme şarê xo dawetê mîtîngê gird yê Qersî kenê.

 

‘Seba şaran bî veng’

 

Hemsereka HDPyî ya Qersî Hacer Karataş Altay zî xebate erjnayîşî û vat, partîya Çep a Keske seba şaran bîya vengêk pîl û vat: “Qers bajarêk kozmopolîtîk o. Nasnameyê cîya kesî ci de ciwîyenê. Xebatê weçînayîşî de ma zêdeyêr şî verê cinîyan. Cinîyî prosesê zehmet ciwîyenê. Cinîyan xebatan de waştî azad bibê. Hawirê azad waştî. Partîya Çep a Keske wazena biba vengê cinîyan. Cinîyê Qersî xo Partîya Çep a Keske de vînayî. Ma hewl da ma xo biresnê heme keyan û merdiman. Merdimî vanê yewin çare Partîya Çep a Keske ya. Tirkî, kurdî, terekeme, tu weçînayîşî de mi yewîyêk wina nêvînabi.” 

 

Hacere venga tewrbîyayîşê mîtîngî kerd û wina qedêna: “Şar wazeno nê krîzê welatî ra xilas bibê. Bi merdiman ra psîkolojiyê tersî esto. Merdimî vanê ma tersenê bêrê awanîya ma tersenê bêrê raşteyan la ma kîşte şima de yê. Ma zî vanê ke paştdayîşê şarê xo veng nêvejenê û têkoşînê xo dewam kenê. Hîrê namzedê Qersî di ci ra cinî yê. Şar bi pozîtîf pêşwazî keno û bi coşêk pîl xebatan pêşwazî kenê. Ma do sibayê 15ê Gulane bi coşê roşanî raşteyan pirr bikerê.”