Dîlan Babat

 

MELETÎ - Namzeda Partîya Çep a Keske ya Meletîye Tulay Şakare da zaneyîş ke xebatê weçînayîşî bêmaben rayra benê û vera operasyonan do heta peynî wayîrê sindoqan bivejê.

 

Şarê Kurdistan û Tirkîya 14ê Gulane de seba weçînayîşê serekkomarî û parlementerî yê demê 28ine do şêrê serê sindoqan. Xebatê weçînayîşî zî bêmaben dewam kenê. Cayê sey Meletî, Dîlok, Hatay, Semsûr ke erdlerzî ra xeylê tesîr bîyî de hemwelatijî mecbur mendî ke şêrî bajaranê bînan. Seba weçînitoxan do otobus bêro amadekerdiş û seba şuxulnayîşê rayan veng yeno kerdiş. Meletî de Partîya Çep a Keske derheqê asayîşê sindoqan de xebata xo dewam kena û ame vatiş ke hûmara weçinitoxan 547 hezar û 104 kesî ya.

 

Meletî de do 547 hezar û 104 kesê raye bierzê

 

Meletî de mabenê weçînayîşê Adara 2019-2023yî de se ra 10 bedilnayîş ameyo ciwîyayîş. Reyna mabenê 2019-2023yî de weçinitoxê ke şîyî 141 hezar û 829 o û hûmara weçînitoxan vînî (merde, yê ke qeydê xo nêgirewtî) zî sey 25 hezar û 937 kesî ame dîyarkerdiş. Hûmara weçînitoxan nika 547 hezar û 104 a. Weçînayîşê deme verênan de zî 516 hezar û 663 kesî raye şuxulnabî. 

 

Namzeda rêza hîrine ya Partîya Çep a Keske ya Meletîye Tulay Şakare derheqê asayîşê sindoqan de qisey kerd û vengê şuxulnayîşê rayan kerd.

 

‘Reaksîyonê tujî yê verêne çinî yê’

 

Tulaye da zanayîş ke çarçeweya xebatan de raşte bi raşte keye bi keye xeyme bi xeyme gêrenê û vat: “Reaksîyonê şarî yê hemverê ma çin o. Şar raya xo nêdo zî reaksîyonê înan eşkera yo. Verê cû weçînayîşan de wina asan xebata weçînayîşî nêameyêne rayraberdiş. Reaksîyon ameyêne mojnayîş. Prosesê erdlerzî de ma mîyanê paştîdayîşî de bî. Heta bi hezaran kes ma ra vatêne ‘şima kişta ma de yê. Şima ma xelisna.’”

 

‘Do têkoşînê ma dewam bikero’

 

Tulaye bale ant operasyon û provakasyonê ke weçînayîşî ra ver virazîyenê ser û wina qiseykerdişê xo peynî kerd: “Partîya ma her tim bi nê operasyonan reyde ameya rî bi rî. No çîyêko newe nîyo. Şaredarîyê ma girewtî. Qeyûm tayînê şaredarîyan kerdî. Ma partîyêka wina rêze ra nîyê. Ma têkoşînê rêxistinkerde ra yenê. Zextê înan do qet çonk bi ma nêdo ronayîş. Têkoşînê ma do dewam bikero. Ma do heta peynî wayîrê sindoqanê xo bivejê. Wa şikê şarê ma çinî bo. Ma yew raya xo zî nêdanê îqtîdarî.”