AMED - Bahar Pekere ya ke komisyonê weçînayîşî yê Partîya Çep a Keske ya Amedî de ca gêna seba asayîşê sidoqan veng kerd û bi sloganê ‘Bibêne muşahîd wayîrê sidoqan bivejêne’ veng daye şarê Amedî.

 

Weçînayîşê 14ê Gulane rê tena çend roje mend û xebatê partîyan bêmaben dewam kena. Babeta tewr muhîm ya weçînayîşî zî asayîşê sindoqan o. Bahar Pekere ya ke komisyonê weçînayîşî yê Partîya Çep a Keske ya Amedî de ca gêna bale ant muhîmîya pawitişê sidoqan û muşahîdbîyayîşî ser. 

 

12 hezar muracatî

 

Bahare dîyar kerd ke weçînayîş seba heme şaranê Tirkîya tarîxî yo û wina dewam kerd: “Ganî ma wina nizdîyê asayîşê weçînayîşî bibê. Ma bi weçînayîşî dekewê prosesêk newe. Sey Partîya Çep a Keske reya yewine ma kewenê weçînayîşî, coka ra ma zêde probleman cuya. Nê probleman ra yew zî çinîbîyayîşê wezîfedaranê sindoqan yê fermî bî. Amed de se ra 70 potansîyelê ma yê rayan esto. Coka ra no seba ma îmkan o. îmkan çi yo; ma eşkenê seba îtîrazî selahîyetdarî temin bikerê, seba îtîrazî kesê selahîyetdar benê û muşahîd benê.”

 

‘Seba ameyoxî ganî ma wayîrê rayan bivejê’

 

Bahare sewbîna da zanayîş ke 14ê Gulane de hedefê înan sera 85 o û wina domna: “Hedefê ma no yo ke ma Amed de 12 parlementeran û pêroyê Tirkîya de 100 parlementeran bivejnê. Na babete de xeylê muracatê muşahîdan estê. Nika 12 hezar muracatî ameyî kerdiş. Waştiş û eleqeyêk gird esto. Şar bi raştî zî wazeno wayîrê îradeya xo, raya xo û sindoqan bivejîyo. Ma nê çîyî baş zanî. Merkezê Amedî de 3 hezar û 673 sindoqî estê. Çend problem bibê zî ma do 14ê Gulane de ser bikewê. Ma sey Partîya Çep a Keske veng danê; badê şuxulnayîşê rayan sindoqanê xo tena vera medêne û meşorêne. Sindoqan taqîp bikerêne. Heqê îtîrazî yê şima esto. Heta aye roje badê tepiştişê zabitnameyê îmzeya hî serê berî de ame daliqnayîş şima eşkenê înan taqîp bikerê. Ganî ma raya xo nêerzê û tena nêverdê û nêşêrê. Ganî ma uca de vinderê û wayîrê raya xo bivejê.”

 

Wayîrê sindoqan vejîyo

 

Bahare peynî de wina vat: “Hema seba muşahîdiyî ma muracatan gênê. Ma muracatê şarê xo pawenê.  Pusulayê rayan vejîyayî. Dorê Partîya Çep a Keske her herême de cîya yo. Nimûne Amed de rêza 12ine de yo. Berpirsyarîyêk pîl kewenê serê milê ma. Weçînîtoxê Amedî xeylêk polîtîk ê. Hişmendîyê nê de yê. Ma bi sloganê ‘Şima zî bibê muşahîd û wayîrê sindoqan vejîyê’ muracatê şima pawenê.”