Rozerîn Gultekîn

 

STENBOL - Dayîka Aştîye Behiye Duman çalakîya seba cinî û tutanê mexdûrê erdlerzî yê 1ê Adare de pê amebi de, polîsan ci rê îşkence kerd û di cayan de paşta aye şikinayî. Behiye dîyar kerd ke do gerre bikero û vat, hemverê hêrişan de game nêerzo.

 

6ê Sibate de erdlerzo ke merkezê ci Mereş bî û tesîr serê 11 bajarî de kerd. Erdlerzan de des hezaran kes, seba bêtedbîrîyê îqtîdarî dinyaya xo bedelnayî. Îqtîdar, vera ke hetkarîya welatijan bikero, hêrişê muxalîfan kerd. Reyna agahîya bi des hezaran tutê ke erdlerz de dinyaya xo bedelnayî, nêkerdî qeydan. Tutê ke xirbeyan ra ameyî vetiş zî bi aşman o vînî yê. Heto bîn ra dîmenê ke tutî hetê tarîkatan ra ameyê vînayîş, vejîyayî werte.

 

Her hetê Tirkîya û Kurdistanî de welatîjî hemverê nê çîyan ameyî ciwîyayîş, vejîyayî kuçeyan.  Polîsan, îşkence welatijan rê kerd. Yew na çalakî ra Tevgerê Cinîyanê Azadan (TJA) ya bi şîarê ‘Dem demê azadîya cinîye yo’ seba startê 8ê Adare, 1ê Adare de Stenbol de Kuçukçekmeceyî da bî. Verê HDPyî yê Kanaryayî de eşkerayîye ameye dayş û polîsan hêriş kerdibi. Hêrişî de dayîka aştîye Behiye Dumana 59 serrî hetê polîsan ra ameye îşkencekerdiş û destbendkerdiş. Polîsan di cayan de paşta Behîye Dumane şikinayê.

 

Behiye îşkenceyê polîse ajansê ma rê qal kerd.

 

Behiye diyar kena 20 serrî tewrê têkoşînî bîya û 35 serr yo têkoşîn kena û 1999ine ra heta nika zî bi dayîkanê aştîye reyde têkoşînê xo dewam kena. Behiye wina vat: “Wexto ke ma dewe de bî, timî eştêne serê keyeyê ma. Pî û hîrê dedê mi bi îşkence kiştî. O wext mi qerarê xo da. Qijî ra ez tewrê têkoşînî bîya. Ez seba tecrîd bişikîyo, seba tepişteyî bêrê veradayîş, aştî pê bêro têkoşîn kena. Pîyê mi kiştî. Ez nêwazena kesê bînî bêrê kiştiş.”

 

Cenazeya pîyê aye nêdayî!

 

Behîye wina vat: “Pîyê mi bi îşkence kiştiş. 4 rojan cenaze erd de verdayî. Dewlete leşkerêk xo kişt û ê eşt milê pî û dedê mi. Seba nê pî û dedê mi şî ko. Dorê înan girewtî dima ra zî kiştî. O wext leşkerêk zî merd. Vatî heta keyeyê leşkerî nêro ma cenaze nêdanê.”

 

Paşta aye şikinayî

 

Behiye dîyar kerd ke dewlete xeylêk reyan îşkence û teda kerda û wina vat: “La têkoşîn û xoverdayîşê mi her rey xurt bi.  Seba cinî û tutê mexdurê erdlerzî, ma eşkerayîye da. Polîsan ma bi îşkence destbend kerdî. Polîsan di cayan de paşta mi şikinayî. Ez serê hişê xo de şîya. Dima ra dayî paşta mi ro. Pêwa ke mi vat, ez nêeşkena helm bigîrî zî înan mi vera nêda. Peyser kelepçe kerdî. Dima ra bi saetan ez wesayît de menda. Peynî de mi berdê Nêweşxaneyê Cigêrayîş û Perwerdêyê Kanunî Sultan Suleymanî.”

 

Doktorî rapor, polîsan zî telefon nêda! 

 

Behîye dîyar kerd ke nêweşxane de vejîyayo werte paşta ci şikiyaya û vat: “Doktorî vat, ganî nêweşxane de bo. La telefon bi polîsan reyde bi. Mi nêeşka agahî bidî keyeyî. Nêweşxane de nêmenda. Pêwa ke paşta mi şikinaye bî, doktorî rapor nêda. Seba ke dejê mi zêde bî, mi o wext rapor pers nêkerd. Eke rapor dabî polîsan zî polîsan nêda mi. Seba ke polîsan kaxid doktoran ra girewtêne. Dimayê îfadeyî ez ameya veradayîş.”

 

Do gerre bikero

 

Behiye tewr peyîn wina vat: “Ez hemverê hêrişan de sere nêtewênena. Yewin waştişê mi polîsê ke îşkence bi mi kerdî bêrê cezakerdiş. Heqê ci çin o însanan rê îşkence bikero. Ez o derheqê polîsa cinî ke îşkence bi mi kerd, muracatê sucî bikerî. Ez o têkoşînê xo dewam bikerî.”