Rozerîn Gultekîn

 

STENBOL - Rîze û Artvîn de Partîya Çep a Keske rêza yewine de namzede cinîyan mojna. Şar eleqeyêk gird nîşanê namzedan dano. Namzedan wina vat: “Ganî ma dormeyê Partîya Çep a Keske de kom bibî. Seba cuyêka seyyewbînan û azade hîna zêde cinî hîna zêde cuye. Ma do AKPyî bişirawê. Ma cinî do aştîye bîyarê welat.” 

 

Weçînayîşê donemê 28ine yê parlementerî û serekkomarî ke do 14ê Gulane de pê bêro rê demêk kilm mend. Partîya Çep a Keske her ca de xebatê xo bêmaben domnena. Behrasîyaye de zî xebate yena rayraberdiş û cayo ke tede reya yewine yo ke namzedê cinî yenê mojnayîş ra yew o.

 

Namzeda Rîzeye ya Partîya Çep a Keske Ayşe Bekar Lokumcu û namzeda Artvînî Fulden Şahîne derheqê xebatanê xo de ajansê me rê qisey kerd.

 

Vera netewperestîye fikrê çepî tercih kerd

 

Namzeda Rîzeye Ayşe Bekar Lokumcuye da zanayîş ke pîyê aye delegeye Partîya Demokratîke (DP) bî û bi serran nê fikrî ra tesîr bîya la wextanê lîseye fikrê aye bedilîyayo û wina vat: “Ma lîseye de kewtêne dorê tupî. Dima ra hukmat bedilîya. Partîya Edaletî (AP) ameye. Fikrê mi yê sîyasî bedilîya. Kulubeyêk telefonî de karkerêk kurd bi keyeyê xo reyde qisey kerdêne. Seba ke kurdî qisey kerd hirê kesî bi hawayêk hov karker derb kerd. Mi zî vat netewperestîyê şima wa çinî bibo. Nê çîyî pêro bîyî sebeb ke ez derbazê çepî biba.”

 

Têkoşînê birayê xo rayra bena

 

Ayşeye waya Metîn Lokumcuyî ya. Metîn Lokumcu weçînayîşê pêroyî yê 2011î de Hopaye de mîtîngê 31ê Gulane yê Tayyîp Erdoganî de netîceyê hêrişê polîsan de bi gazê îsotî xora şî û nêweşxane de dinyaya xo bedilna. Ayşeya ke bi serran têkoşînê birayê xo rayra berd wina vat: “Mi derheqê birayê xo de parekerdişî kerd. Mîyanê înan de di karîkaturê weçînayîşî rê dewa ame akerdiş. Qaşo derheqê nê parekerdişan de gerre kerdî. La ez bawer nêkena. Dima ra 11 aşme ceza dayî mi. Vatî ya ti na cezaye ancena ya zî ti do cayo ke dewlete vana ti bixebete de bişuxula. Mi qebul nêkerd. Dima ra vatî ke ganî ti 5 serran de qet sucêk nêkera.” Ayşeye vera heme tedayan hemverê polîtîkaya dewlete de têkoşînê xo rayra bena. 

 

Partîya Çep a Keske hêvî dana 

 

Ayşeye qiseykerdişê xo yê peyênan de derheqê rêza yewine ya Partîya Çep a Keske ra Rîzeye de namzed mojnayîşê xo de wina vat: “Namzedîya mi de paştîdayîşê HDPyî yê prosesê dewaya Metînî tesrî bî. Na partîye de hûmara cinîyan zêde ya. Na rewşe mi ser de xeylê tesîr viraşt. Ez aştîya komelî wazena. Partîya Çep a Keske hêvî dana mi. Birayê  mi vengê her kesî bî. Ez berardoxkara çayî ya. Seba çareserîya probleme xozaye bîya namzed."

 

HADEP ra heta Çep a Keske

 

Namzeda Artvînî Fulden Şahîn zî dîyar kena ke têkoşînê aye serrê lîseyî de dest pêkerdê û dima ra bi HADEP ya 1994ine de awan bîya dewam kerda, ewro zî bi Partîya Çep a Keske dewam keno. Fuldene ke hemverê şîdetê dewlet-camêrdî têkoşînê cinî û ekolojî dana, qerar daya ke têkoşînê xo Partîya Çep a Keske de bîyara têhet. Fuldene wina dewam kerd: “Çep a Keske têduştî pawena. Dorê ma de bêhuqûqî û binpaykerdişî pê yenê. Hêzê tepiştişî vejêno. Texrîbatê xozayî yeno ciwîyayîş.  Îstîsmarê tutan zêde bî. Dima ra erdlerzî de mi têkoşînê xo binê nê sîwanî de kerd yew.”

 

Cinîyan ra paştdayîş

 

Fuldene bale ant serê namzedîya xo û dîyar kerd ke  rêza yewine de mojnayîş xeylêk muhîm o û wina vat: “Ma her tim vatêne partî têduştîya cinî pawena. Heta merdiman bi çimanê xo nêdîne bawer nêkerdêne. Nika bi namzedîya mi ra vanê raya ma seba namzeda cinî. Bi taybetî cinîyan paştdayîş xeylêk pîl o. Partîya Çep a Keske hemverê her tewirî problemêk beno hêzê çareserî. Ma bi heme şaran reyde yenê têhet û xebatê xo wina dewam kenê. Sere de seba mi û seba heme her kesî no weçînayîş zaf muhîm o. Ma vanê tewr zêde cinî muhîm o. Ma vanê zêdeyêr cinî zêdeyêr cuye.”