Rojda Aydin

 

MÊRDÎN - Sîyasetmedaran seba mîtîngê Partîya Çep a Keske ke do siba raşteyê Newroze yê Qoserî de bêro viraştiş vatî: “Ma pîya vengê xo berz bikerê, wa coş bibo coşê 14ê Gulane.”

 

Partîya Çep a Keske çarçeweya Weçînayîşê Pêroyî yê 14ê Gulane de her kuçeyê Kurdistan û Tirkîya de xebata xo weçînayîşî bêmaben domnena. Bi wesîleya 5ê gulane yanî siba bi tewrbîyayîşê Hemsereka Partîya Herêmê Demokratîke (DBP) û namzeda Mêrdînî Salîha Aydenîz û Hemşaredara Bajarê Girdî ya Mêrdînî ke qeyûm tayînê herinda ci amebî tayînkerdiş Ahmet Turkî do saet 14.30î de Raşteyê Newroze yê Qoserî yê Mêrdînî de mîtîngek gird bêro viraştiş. Seba mîtîngo ke do bêro viraştiş raşte, tax û dewan de xebata vendgayîş û tewrbîyayîşî dewam kena.

 

Hemşaredara Şaredarîya Qoserî ya ke qeyûm tayînê herinda aye amebî kerdiş Nîlufer Elîk Yilmaz û Rayîrbera Partîya Demokratîke ya Şaran (HDP) a Mêrdînî Adîle Kizilaye seba mîtîngê Qoserî şarê Mêrdîn û Qoserî dawet kerd.

 

‘Ma do 14ê Gulane de ser bikewê’

 

Nîlufer Elîk Yilmaze dîyar kerd ke şar ver bi weçînayîşêk xeylê muhîmî ra şino û no weçînayîş weçînayîşê seserrî yo. Nîlufere seba şaran ard ziwan ke lazimî pê esto ke hemên ê zîhnîyetî de bî û wina dewam kerd: “Ganî her kes nê ferqî de bibo ke no weçînayîş çend muhîm o. Çike no îqtîdar bi serran o serê heqanê cinîyan, kiştiş û çinîkerdişî de xo dano ciwîyayîş. Seke yeno zanayîş weçînayîşî rê wextêk tay mendo. Waştişê ma no yo ke wa şarê ma raya xo bido xo û wayîrê sindoqan bivejîyo. Bado ke ma raya xo eşt ganî heta peynî ma wayîrê sindoqan bivejî. Bawerîya ma bi şar û hêzê ma ra esto. Ma do 14ê Gulane de ser bikewî û ma do 1ê gulane de mizgînîya aştîye bidî.”

 

‘Ma do ser bikewê' 

 

Nîlufere da zanayîş ke ê do 5ê gulane de yanî siba saet 14.30î de Raşteyê Newroze de mîtîngêk girseyî pê bîyarê û wina dewam kerd: “Ma heme şarê xo yê Mêrdîn û Qoserî dawetê mîtîngê xo kenê. Çike no mîtîng zî xeylê muhîm o û lazimo ma na roje de cewabêke xurt bidê. Kar û xebata ma ya tax û dewan dewam kena. Ma do 14ê Gulane de tesilî ser bikewê. Ma do 5ê gulane de Raşteyê Newroze de vengê azadîye pîya gur bikerê û ma do vajê 14ê Gulane de ma do ser bikewê û 15ê gulane de zî mîzgînîya aştîye bidê.” 

 

‘Wa no coş bibo coşê 14ê Gulane’ 

 

Adîle Kizilaye zî dîyar kerd ke weçînayîş seba ke ‘bîyayîş û çinîbîyayîşê’ Şarê Kurdî dîyar keno xeylê muhîm o û wina qiseykerdişê xo qedêna: “Nê semedî ra polîtîkayê lêşinî cinî û şarê kurdî ser de yenê rayraberdiş û seba ke ma nê îqtîdarî birijnî lazim keno ke ma wayîrê sindoqanê xo bivejê. Ma wayîrê raya bivejî. Çike weçînayîş seba ma xeylê muhîm o. Ma veng danê pêroyê Qoserî ke ê bêrî û ma pîya mîtîngê xo bivirazê. Ma 5ê gulane de saet 14.30î de Raşteyê Newroze de arê bibê û vengê xo berz bikerê. Ganî ma mîtîngê xo bi coşêk komî pê bîyarê. Coka ra zî ma veng danê şarê Mêrdîn û Qoserî ke wa bêrî ma pîya mîtîngê xo bi coşêk gird pê bîyarê. Wa no coş bibo coşê 14ê Gulane.”