Şehrîban Aslan

 

AMED - Dimayê 10 aşmî dima derheqê Mudura xeberan ê Ajansê JINNEWSî Safîye Alagaş de îddîaname ame amadekerdiş û roniştişê yewin ê dewa do 25ê gulane de bêro vînayîş. 

 

Dimayê 10 aşmî dima derheqê Mudura xeberan ê ajansê ma JINNEWSî Safiye Alagaş de îdîaname ame amadekerdiş. Safiye, 8ê hezîrana 2022ine de çarçewaya cipersayîşê ke hetê Serdozgerîya Komare ya Amedî ra ame destpêkerdiş de ameye destbendkerdiş û dima ra ameye tepiştiş. Îdîanameyê ke ame amadekerdiş hetê 5ine Dadgeha Cezaya Giran a Amedî ra ame qebûlkerdiş. Roniştişê yewin ê  dewa do 25ê gulane de bêro vînayîş. 

 

Îdîaname 383 rîpelan ra pê yeno û hesabê Youtube yê JINNEWSî, hesabê medyaya dijîtal û ûsn. ameyî cigêrayîş û wina ame vatiş: "Goreyê îdeolojîya rêxistine serê malperî de propagandayê rêxistine kerda.” Sewbîna xeberê derheqê Abdullah Ocalanî, tecrîd, tepişteyê nêweşî, keyeyê tepiştryanê nêweşan, grevê vêşanîye, binpaykerdişê heqê merdiman sey sûc ameyî ercnayîş. Xeberê rûtin yê sey "Ma fedekarîya Aysel Dogan xo vîr ra nêkenê, cinîyî tewrê Konferansê Herêmî bî, Meclîsê Kultur û Hunerî yê HDKyî ame awankerdiş sey sûcî ameyî vînayîş. Sewbîna îdîanameyî de fotografê xeberanê rûtin zî sey malzemeyê sûcî ameyî ercnayîş. 

 

Sewbîna îdîanameyî de îfadeyê Safîye zî yê derheqê xebatanê xo û xebatê JINNEWSî de ca girewt. Vatişê Safîye yê îddinameyî de wina yo: "Ez berpirsîyarê karê nuşteyî yê JINNEWSî ya, eynî wextî de ez hem edîtorî kena û hem zî xeberan viraznena. Şirketê JINNEWSî yê mi bi xo yo. Çekûya tecrîdî çekûyêka rêxistinî nîya, hetê aye yê mîyanneteweyî zî esta û seba kesê ke ameyê îzolekerdiş a çekû yena şuxulnayîş. Komploya Mîyanneteweyî zî hetê kurdan ra yena şuxulnayîş. Rojnameyê Xwebûnî zî goreyê talîmatê PKKyî nê, goreyê îradeyê xo xeberan virazneno. Serra 2017ine de dimayê ke qeyûm tayînê Şaredarîya Peyasî ame kerdiş, mi kar ra vet û mi dest bi rojnamegerî kerd. Mi  waşt ez bi rojnamegerî têkoşînê cinîyan bîyarê ziwan û mi seba nê ajans akerd. Belgeselê ke sey sûc yenê ercnayîş, prosesê çareserî de ameyî viraştiş. Ez îdîayê ke derheqê mi de ameyê amadekerdiş qebûl nêkena." 

 

Dozgerî, endamîya Cemiyetê Rojnamegeranê Azadan ke bi KHKyî ame padayîş, viraştişê xeberan û wayîrbîyayîşê JINNEWSî sey sûc ercna û waşt bêra cezakerdiş. 

 

Îdîanameyê ke ame amadekerdiş hetê 5ine Dadgeha Cezaya Giran ya Amedî ra ame qebûlkerdiş û roniştişê yewin ê dewa zî do 25ê gulane de bêro vînayîş.