ANQARA - Hemsereka DFGyî Dîcle Muftuogluye çarçeweya tehqîqato ke merkezê ci Anqaya bî, 4 roje verê cû ameybî destbendkerdiş. Ame zanayene ke xebatê rojnamegerîye, seyahatê ke kerda û pêvînayîşê bi telefonî aye rê ameyî persayîş.   

 

29ê nîsane de çarçeweya operasyonê qirkerdişê sîyasîyî de yo ke merkezê ci Anqara bî de xeylê bajaran de sereştişê keyeyan virazîya. Gureyê îfadegirewtişî yê Hemsereka DFGyî û edîtora Ajansê Mezopotamyaye Dîcle Muftuoglu, Edîtorê MA Sedat Yilmaz û cinîya ci Selma Yilmaz, Stenbol de Fîlîz Yilmaz, Cahît Kanbay,  Cîhan Guneş, Ramazan Debe, Erol Balci, Evîn Ozbek, Ridvan Aslan, Îsmaîl Adanmiş, Cahît Ablay, Mahmut Dogî, Devran Ak, Hasan Ozhan, Şemsettîn Toprak, Abdurrahîm Tanyerî û Mehmet Emîn Yildirimî qedîya. Yeno pawitiş ke ewro rojnameger û hemwelatijê bînî bîyarî Edlîyeya Anqaraye.

 

Îfadeyê emnîyetî de sucdarkerdişê serê Dîcleye de îfadeyê Kerem Gokalp û şahido nimite yê bi kodê “K8Ç4B3L1T5” ke nameyê înan Dewaya Kobanê, dewaya SES û TJAye de zî derbaz beno, esto. 

 

Dîcleye çarçeweya tehqîqato ke ameyo rayraberdiş de xebatê meslekî, seyahatê ke kerda û qeydê HTSyî ameya sucdarkerdiş. Tehqîqatî de DFG ke Dîcle hemsereka ci ya û Ajansê Mezopotamya ke tede xebetîyena sey ‘teberê huqûqî’ ameyî mojnayîş.

Polîsan Ajansê Mezopotamyaye rê vat, “qaşo” la Dîcle reaksîyon nîşan da û vat: “MA ajansêk ke xebata xo bi qanûnî kena ya. Ez ewja de rojnamegerî kena. Ez çarçeweya tu fermanêk de nêxebetîyena.”

 

Dîcleye serra 2017î de seba taqîpkerdişê referandumê Herêma Kurdistanê şîya herême û persan de şîyayîşê aye zî ameyo persayîş.

 

Dîcleye rê qeydê telefonî yê mabenê serra 2013-2020î ameyî persayîş. Dîcleye dîyar kerd ke nê kesan ra yew zî nêşinasnena û aye bi meslektaş û çimeyê xo yê xeberan reyde pêvînayîş kerda û pêvînayîşê aye pêro çarçeweya ebatê rojnamegerîye de bî.

Sewbîna qeydê Historical Traffic Search (HTS) yê mabenê serrê 2014-2020, 2013-2016 û 2015-2020î yê Wan, Amed, Şirnex û Edeneyr xî Muftuogluye ameyî persayîş. Sebebe qeydê HTSyî yê xeylê kesan Dîcleye rê ameyî persayîş û Dîcleye da zanayîş ke aye xeylê kesê ke nameyê înan derbaz beno nêşinasnena û heme qeydî verêne zî çarçeweya xebatê rojnamegerîye de kerda.

 

Sewbîna Sedat Yilmaz, cinîya ci Selma Yilmaz û waya ci Fîlîz Yilmaze zî Muftuogluye ameyî persayîş. Xora Dîcle û Sedat Yilmaz eynî ajansî de xebetîyenî la reyna zî înan rê ameyo persayîş. Heto bîn de xebatkar û rojnamegerê Ajansê Mezopotamyaye Dîcleye ra persîyayî. Qeydê hempar yê rojnameger û Muftuogluye sey suc ameyî mojnayîş. 

 

Dîcleye ra transfera pereyan yê Ajansê Xeberan yê Dîcle (DÎHA) ke bi Qerarnameyê Hukmê Qanûnî (KHK) ame padayîş û ewja de Dîcleye mudira karê nuşteyî û wayîrê îmtiyazî bî ameyo persayîş. Pereyo ke Muftuogluye mabenê xo û keye û hemkaranê xo de kerda û raporê MASAKî kerdî babeta sucdarkerdişî.

 

Dîcle ye sucdarkerdişan red kerd û dîyar kerd ke aye rojnameger a, 3 roje yo xebata aye ya rojnamegerîye ameya astengkerdiş û vat: “Rojnamegerîya ke ez kena rayaumûmîye rê akerde yo, verê çimanê her kesî de yo.”