Dîlan Babat

 

SEMSUR - Dewijê dewa Şêxborî ke şar 6 serrî yo nêrazîbîyayîşê xo mojnenê de dest bi viraştişê awbende ame kerdiş. Dewijî dîyar kenê ke raşteyo ke înan rê ameyo mojnayîş zî roşîyayo Cengîz Holdîngî. Dewa ke çimeyê îdareyê ci titun o de êdî aye zî nîno berardiş û awanîyî zî erdlerzî vera zirar dîyî.

 

Semsûr erdlerzê 6ê Sibate ke merkezê ci Mereş bî ra zirarêk gird dî û bajarê ke tewr zêde tesîr bîyî ra yew o. Semsûr ke xeylê qeza û dewê aye erdlerzî ra zirarêk gird dîyî de serra 2017î ra nata wêrankerdişê ekolojîk dewam keno. Erdlerzî reyde dewa Şêxborî ya Semsûrî ke tede 60 keyeyî estbî de nika tena 43 keyeyî sax mendî. Hemwelatijê dewe ke seba 17 awanîyan qerarê rijnayîşî ameyo dayîş, bi problemê awbende ke 6 serrî verê cû viraştişê ci dest pêkerd û nîmcet ame verdayîş reyde rî bi rî yo. Tena Şexbor, dewa Gokçay û Baglicaye nê binê tersê awbendî de yo.

 

6 serrî yo nedîyarîyêk esto

 

Serra 2017î de bi viraştişê awbendî ke dest pêkerd, berardişê titunî ke îdareyê cuya hemwelatijanê Şexborî yo zî ame birnayîş. Hemwelatijê ke 6 serrî yo bi sozê ‘Ma do seba şima raşteyêk, şima do tîya bi ca bibê’ yenê xapênayîş, dayî zanayîş ke eke awbende bêra viraştiş do dewe înan bikewa binê awbendî. Vera heme nêrazîbîyayîşan gamêk zî nîno eştiş û na reye zî yeno îdîdakerdiş ke xeylê raşteyê ke hemwelatijî waştî tede ca bibî roşîyayî Cengîz Holdîngî.

 

'Seba awbende dewe de çîyêk nîno kerdiş’

 

Hemwelatijê Şexborîye Turkan Yoldaşe ard vîr ke serra 2017î ra nata înan rê yeno vatiş ke do herême de awbende bêra viraştiş û dîyar kerd ke aye roje ra nata 6 serrî derbaz bî û na reye zî nêeşkenê awanîyanê xo yê ke erdlerzî ra awan bikerê. Turkane vat: “Erdlerz qewimîya. Keyeyê ma rijîya. Keyeyo ke ez tede ya tay xeripîyayo, la ma nêeşkenê bikewê mîyan. Seba awbendî dewe de çîyêk nîno kerdiş. Ma nêzanê do dewa ma se biba. Ma Semsûr de keye girewt, la erdlerzî vera zirar dî. Ma tersenê ke birijo.”

 

6 serrî yo dîyar nîyo

 

Turkana ke îdareyê aye berardişê titunî yo ard ziwan ke awbende vera nêeşkenê berardiş bikerê û vat: “Seba ke cayê ma nîno zanayîş ma nêzanê. Herra ke ma tede maya xo ra bîyî, binê awe de ya. Seba ma zî zehmet o. No 6 serrî yo rewşêka wina nedîyar de yî. Îdareyê ma wina nêbeno. Nêzanê se bikerî.”

 

'Ma nêeşkenê daran zî biçînê' 

 

Kadrîye reaksîyon vera vatişê ke ameyo vatiş do seba înan cayêk bêro visnayîş û çira nêameyo visnayîş û wina vat, "Yoldaşa ke keyeyê ci Sêmsûr de seba erdlerzî rijîya, dîyar kena ke keyeyê aye dewe xira nêbîyo la bi viraştişê awbend reyde do keyeyê aye binê awe de bimano. Kadrîye vat: “Bi serran o herêmeke ke ma ca bibê nîşan nêdanê. Ma nêzanê ma şinê ça. Do awe bêro û ma do binê awe de bimanê, ma a rewşe de yê. 21 serrî yo vanê awbend yeno viraştiş. Ca nîşanê ma nêdayî, dest bi viraştişê barajî kerdî, awe zî nîmced verdayî. Ma îtîraz kerd, la ma ser nêkewtî. Na dewe verê laserî de zî şêro ma nêzanê sera şêrê. Na dewe veng a, ne darêke menda û ne zî ma eşkenê darêke biçînê.”

 

'Ma baraj nêwazenê'

 

Kadrîye, reaksîyon vera nê nêdîyarbîyayîşî mojna û vat, "Soz dayî ke ma rê cayêk ci bivisnê la nêkerdî. Ma nêwazenê awbend bêro viraştiş. Dewa ma zaf weş a. Keyeyê ma Sêmsûr de xira bi la çîyêk bi keyeyê ma yê dewe nêame. Hewayê dewe weş a. Herra ci bi berket a. Ti çi biçînê berardiş dana seba ke herra dewe baş a. Debara ma bi tûtinî ya. Ek dewlete destûr bida ma roşenê, eke nêda zî destê ma de maneno."