ANQARA - Rojnamegerê tepişteyî Habîbe Eren, Denîz Nazlim û Berîvan Altan Zîndanê Sîncanî ra mesajê 1ê Gulane şirawitî û vatî: "Rojê azad bi qasê têkoşînê ma nêzdî yo û do faşîzm vînî bikero. Biciwîyo Çapemenîya Azade." 

 

Muxabîra ma JINNEWSî Habîbe Eren, mûxabîrê Ajansê Mezopotamyayî (MA) Denîz Nazlîm û Bêrîvan Altana çarçewaya cipersayîşê Anqarayî de 29ê Teşrîna Verêne de 2022 de ameyî tepiştiş û seba wesîleya 1ê Gulane Roşanê Kede û Paştdayîşî de mesaj şirawitî. Rojnamegerê tepişteyî Temsîlkarîya Basîn-Îşê Anqarayî yê Konfederasyonê Sendîkayanê Şorişgêran (DÎSK) rê mesaj şirawitî û no mesajî serê hesabê medyaya dîjîtale yê sendîkayî de ame parekerdiş.

 

Mesajê rojnamegeranê tepişteyan wina yo: 

 

‘Helbet zulm û zordarî heta bi heta nêmaneno’ 

 

Habibe Eren: Mîras û têkoşînê şaran, kedkaran û cinîyan tarîx ra heta ewro pêro dinya de veng dano. Ewro her çiqas destkewtişê kedkar û cinîyan bi bedelê giran bi dest kerdê zî hetê rejîmê dîktatorî yê faşîst ra hewl yeno dayîş ke bêro pûçkerdiş zî, sloganê ke her cayî pîl benê, açarenê vengêk berz. Ma 1ê Gulane zîndanan de pêşwazî kenê. Her roj xeberê destbendkerdişî û tepiştişê meslegdaranê ma yeno. Sey pêro beşê komelî, kedkarê Çapemeniya Azade zî seba hêrişê dewlete mexdûr benê. Yê ke fikrîyenê ke bi tedayanê wina Çapemenîya Azade bêveng bikerê û serê çokan de bidê roniştiş, şaş ê do vînî bikerê. Ma a bawerîye de yê ke qelema kesê ke nîmeyê kuçeyî de bîyê qurbaniyê kiştişêk kerdoxê nêdîyar, ne yê ke bombevaranî de ameyî qetilkerdiş, ne qelema Apê Mûsa û ne zî Gurbetelli Ersozler do erd de bimano, sey qelema rojnamegeranê tepişteyan. Labelê şikê ma çin o ke her ca de şar û nêrazîbîyayîşê ci estê têkoşîn bi coş dewam keno. Bi nê munasebetî ma do 1ê Gulane pêro şaran, kedkar û cinîyan pîroz kenê. Helbet zilm û zordarî heta hetayî nêmaneno, rojê azad bi qasê têkoşînê ma nêzdî yê.

 

‘Do nêeşkê çapemenîya azad bêveng bikerê’

 

Bêrîvan Altan: Ma waştêne ma 1ê Gulane de raşteyan bi kedkaran reyde pêşwazî bikerê û xeberanê înan taqîb bikerê, la ma zîndanan de pêşwazîya na roje kenê. Îqtidarê AKP-MHPyî bi hêrişê serê Çapemenîya Azad kampanya weçînayîşî rayra beno. Embazê ma ke heqîqet nusenê yenê destbendkerdiş û tepiştiş. Hewteyêk peyîn de xeylêk embazê ma yê rojnamegerî ameyî destbendkerdiş û tepiştiş. Embazê ma yê rojnamegerî Abdurrahman Gok, Mehmet Şah Oruç, Bêrîtan Canozer, Mîkaîl Barut û Remzî Akkaya ameyî tepiştiş. Îqtidaro ke terseno vînî bikero na rey zî embazanê ma Dîcle Muftuoglû û Sedat Yilmaz destbend kerd. Çapemenîya Azad ke serranê 90î de bi bombakerdiş û qetilkerdişan bêveng nêbî, do ewro qet bi destbendkerdişan, tepiştiş û îşkenceyî bêveng nêbê. Pêro kedkar û karker û meslegdarê ma ewro raşteyê  1ê Gulane pirr kerdî do bibê vengê ma û ma bawer ê do têkoşînê Çapemenîya Azade do hîra bikerê. Ma vanê do nêeşkê çapemeniya azade bêveng bikerê.

 

‘Wa biciwîyo çapemenîya azade’

 

Deniz Nazlim: Ma do 1ê Gulane heme karker û kedkaran pîroz kenê. Ma bi bedenê xo uca nîyê, la hetê manewî ra ma beşdarê têkoşînê xo yê seba demokrasiyê Tirkîya, azadiya şaran û kede benê. Ewro 1ê Gulane de ma rojnamegerê tepişteyî hem seba ke ma karê xo bikerê hem zî seba pawitişê heqanê xo wazenê nê raşteyan de bi coş û kelecan ca bigirewtêne. Labelê îqtidarê AKPyî ke wazeno rastiyan tarîtî de verdo, hewteyê peyîn de bi desan embazê ma destbend kerdî û 5 embazê ma ameyî tepiştiş. Pêwa ke roj bi roje hûmara rojnamegerê tepişteyî zîndanan de zêde beno zî hem rojnamegerê pey rastî yê û hem zî yê ke heqê rojnamegeranê tepişteyan pawenê. Seba nê ma zaf bênerehet ê. Ma a bawerîye de yê ke coşê bi se hezar ke raşteyan kom bîyê do bibo sedemê azadî û demokrasî. Ma her kesî rê serkewtişî wazenê, ma seba nê silam û hêviyê xo zindanê Sîncanî şirawenê. Seke erjîyaye Abdurrahman Gok vato, 'Faşîzm do vîndî bikero, biciwîyo Çapemenîya Azade.