Melek Avci

 

ANQARA - Namzeda Partîya Çep a Keske ya Anqarayî Hatîce Goz derheqê operasyonê îqtîdarî de qisey kerd û vat: “Hêrişan zêde kenê la no xilasiya înan nîyo. Do tu çîyêk vernîya tersê înan nêpado. No şar bi qerar o. Do ê şêrê, bêrê muhakemekerdiş, hesab bidê û ma do têkoşînê xo seba nê bidê.”

 

Weçînayîşê 14ê Gulane rê demêk kilm mend û xebatê Partîya Çep a Keske her ca de domenê. Heto bîn ra zî merkezê ci Amed, 21 bajaran de operasyonê qirkerdişê sîyasî pê ame û rojnameger, siyasetmedar, hunermend û avûkatî zî mîyan de bi seyan kesî ameyî destbendkerdiş. 48 kesî zî serê îfadeyê îtîrafkar Umît Akbiyik ameyî tepiştiş. Namzeda Partîya Çep a Keske ya Anqarayî Hatîce Goz proses ercna û dîyar kerd ke no operasyon do vernîya înan de nêbo asteng.

 

Hatîce Goz kam a?

 

Hatîce Goza ke namzeda partîya Çep a Keske ya herêma yewin ê Anwarayî ya, bi serran tevgerê sosyalîst-femînîst de xebate kerda. Hatîce sebebê cagirewtişê Partîya Çep a Keske de zî wina vana:  “Heme têkoşînî kîşte yewbînan de yê û bawerîya ke komarêka demokratîke awan bikerê dano. No ca zî Partîya Çep a Keske yo. Seba nê ez tîya ya.”

 

Hatîceye dîyar kerd ke xebatê weçînayîşî her ca rayra benê û şinê her ca û vat: “Prosesêk weçînayîşî esto. Ma do xebatê xo 1ê Gulane de tacîdar bikerê. Dima ra zî ma do Tifaqê Ked û Azadîye parlamentoyî de xurt bikerê. Ma do têkoşînê xo yê rêxistinkerde xurt bikerê. Raşte de kelecan û pawitişêk pîl esto. No 20 serrî yo no komel îqtîdarî ra bêzar bîyo. Partiya Çep a Keske hêvî û kelecan dana şarî. Ma zî hewl danê ke bibê kedkarê nê. Hêvîya ma a ya ke 14ê Gulane de faşîzm vînî bikero.”

 

‘Cinîyan têkoşînê xo pîl kerd’ 

 

Hatîce dîyar kerd ke Partîya Çep a Keske hemverê tifaqê dişminî cinî partîyêke cinîyan esas gêno yo û vat, pêro sîyaset û îqtîdarê Tirkîya wayîrê hişmendîyêk ke têkoşînê cinî nêvînê yo. Hatîce wina dewam kerd: “Sermaye keda cinî bîyayîşê cinî bedenê cinî binpay keno. Her ca de teda serê cinîyan de yeno kerdiş. Peymana Stenbolî ameye fesihkerdiş û ma bi îqtîdarêk ke dişminê cinîyan reyde rî bi rî yo yê. Hemverê tifaqê dişminîyê cinîyan keno Partîya Çep a Kesk û têkoşînê cinî esto. Partîya ke tewr zêde  namzedê cinî ramojnaya Partiya Çep a Keske ya. No tesaduf nîyo. Seba ke na partî tevgerê cinîyan ra wey bena.”

 

Tersê vînîkerdişî 

 

Hatîceye bale ant serê operasyonê qirkerdişî siyasî û wina dewam kerd: “No hêrîş ters û hêrsê îqtîdarî yê vînîkerdişî yo. Ameyî peynîya rayîrî. Seba nê zî ters û hêrsê înan her ke şino zêde beno. Seba nê zî hêrişî her cayê kenê. Hewl danê îradeyê şarê kurdî xesp bikerê. Do nê hêrişî nêbê sebebê xelasîya înan. Ma nika heme pîya seba welatêk de demokrasî awan bikerê nûqtayêk girîng de yê. Seba awankerdişê komarêka demokratîk zî adres Partiya Çep a Keske ya. Ez venga pêro kesî kena. Bêrê ma têkoşînê xo binê banê Partiya Çep a Keske de bidê û pîya serbikewê.”