Şehrîban Aslan

 

ÊLIH - Namzeda Partîya Çep a Keske ya Êlihî Nurten Ertugrule da zanayîş ke heta problemê kurdî çareser nêbo tu problemêk çareser nêbeno û vat: “Sey cinîyêk kurde ez seba ke vera qirkerdişê cinîye de têkoşîn bikera Êlihijan ra raye wazena.”

 

Weçînayîşê demê 28ine yê serekkomarî û parlementerîye ke do 14ê Gulane de pê bêro rê tay mend û Partîya Çep a Keske xebata xo ya weçînayîşî bêmaben domnena. Partîya Çep a Keske lîsteya xo ya namzedan de se ra 45 ca daye cinîyan. Namzedê Êlihî ra di heb cinî yê. Nurten Ertugrule rêza 4ine de ca gêna. Nurtene Çewlîg ra ya û Partîya Çep a Keske ra ver rêxistinê komelkî yê sîvîlî de têkoşîn daya. Sey endama Heyetê Vervatoxîya Partîya Demokratîke ya Şarî (HDP) xebat rayra berda û nika zî namzeda Partîya Çep a Keske ya.

 

‘Cinîyan ser de polîtîka yene rayraberdiş’

 

Nurtene dîyar kena ke bajaro ke tede ameya dinya û bajaro ke ci ra bîya namzed cîya bibê zî probleme înan manenê yewbînan û wina vat: “Çîyê ke Çewlîg de yenê cuyayîş tîya de zî yenê cuyayîş. Çîyê ke tîya de yenê cuyayîş Tirkîya de yenê cuyayîş. Cinî û tutî yenê qetilkerdiş. Sebebê înan ra yew zî polîtîkaya şerê taybet a.”

 

Tabloyê qirkerdişê serê cinî 

 

Nurtene dewam de dîyar kerd ke îqtîdar û partîyê pê reyde tifaq kerdê serê cinîyan de sîyaset kenê û wina vat: “Esas de no prosesêk 21 serrî nîyo. Demê komare ra heta nika no proses yeno. Vatî; heqê cinîyan, vatî cinîyan heq bidest kerdî, hetê cinîyan de  profîlêk vetî. La nika cinî yenê astengkerdiş. Ma Em meclîs rê biewnê, profîlê cinîya ke entegreyê zîhniyetê serdestî yê camêrdî bîya, esta. 21 serran de  bi hezaran cinî ameyî qetilkerdiş. Kiştoxê cinîyan yenê veradayîş. Qetilkerdiş hende cinî qirkerdişê serê cinî yo. Gulistan Doku hema nêameya vînayîş.  Gelo çira nîna vînayîş. Kurdistan de hemverê kiştişê cinîyan veng nêvejenê.” 

 

Problemê esasî yê kurdî yo

 

Nurtene da zanayîş ke problemê esasî yê kurdî yo û wina dewam kerd: “Welat de problemê tewr esasî yê kurdî yo. Heta ke problemê kurdî nêro çareserkerdiş welat zî asayî nêbeno. Çareserkerdişê ekonomî, sîyaset, cinî, perwerde û weşîye bi çareserkerdişê problemê kurdî mumkun o. Ganî îqtîdaro ke bêro zî nê çîyî baş bizano. Ma seba bîyayîşî têkoşîn danê. Ez sey cinîyêka kurde seba ke vera qirkerdişê cinîye de têkoşîn bikera Êlihijan ra raye wazena.”