WAN - Komîteya Amadekare ya 1ê Gulane ra Fîgen Çolakogluye dîyar kerd ke do Wan de bi sloganê ‘Seba destpêkêk newe; kede ya ma vatiş ya ma yo’ mîtîngê 1ê Gulane pê bîyarê û da zanayîş ke do pîya têkoşîn bikerê û pîya ser bikewê.

 

1ê Gulane Roja Kedkaran ya Dinya nizdî bena û kedkar xo hadre kenê ke her ca de biherikê raşteyan. Platformê Şûbeyê Konfederasyonê Sendîkaya Kedkaranê Rayapêroyî (KESK) ya Wanî, Konfederasyonê Sendîkaya Karkeranê Şorişgêrî (DÎSK) ya Wanî, Baroyê Wanî, Odaya Tabîban a Wan-Colemêrgî, Odaya Doktoranê Diranan, Yewîya Odaya Muhendis û Mîmaran a Wanî (TMMOB) û Heyetê Koordînasyonê Wanî amadekarîyê xo yê seba mîtîngî temam kerdî.

 

‘Do hêz bidî hêzê xo’

 

Wan de 1ê Gulane Roja dişeme bi siloganê ‘seba destpêkêk newe; ked ya ma vatiş ya ma yo’ Parka Aştîye ya Musa Anterî de do mîtîng pê bêro. Kedkar xo hadre kenê ke bi kortejan tewrê mîtîngî bibê. Komîteya Amadekare ya mîtîngî ra Hemsereka SESî Fîgen Çolakogluye qisey kerd û dîyar kerd ke heme amadekarî temam bî û vat: “M abi hêvîya sibarojê azade têkoşîn danê, raşteyan dekenê û kelecanê nê çîyî cuyenê. Ma heme şarê xo dawetê mîtîngê 1ê Gulane kenê û ma veng danê şarî ke hêz bidî hêzê ma.”

 

‘Wa bibo wesîleya azadî û demokrasî’

 

Fîgene dîyar kerd ke weçînayîşan rê demêk kilm mendo û bale ant serê muhîmîyê weçînayîşî û vat: “Ma şarî bi xepskerdişê heqî, binpaykerdişê kede, şîdet û qedexeyan reyde rî bi rî yê. Pêwa nînan ma têkoşîn kenê. La no qîm nêkeno. Na cografya de bi destbendkerdişê cidî darbe dayî demokrasî ro. Nê teda û destbendkerdişî nînê qebûlkerdiş.” 

 

Seba mîtîngî dawet kerdî

 

Fîgene tewr peyîn qiseykerdişê xo de dîyar kerd ke tewrbîyayîşê şarî yê Mîtîngê 1ê Gulane xeylêk muhîm o û ganî her kes hemverê nê bêedaletî vengê xo berz bikero. Fîgene vat, ganî pîya têkoşîn bikerê û pîya serbikewê.