Melek Avci

 

ANQARA - Karkera weşîye Reyhan Tufekçîye seba 1ê Gulane venga daye karkeran û vat: “Ganî peynîya binpaykerdiş û tedayan bêra, îqtîdarî bikero destê şarî û seba nê zî ma do raşteyanê 1ê Gulane de bê.”

 

14ê Gulane de do weçînayîşê serekkomarî û parlementerî pê bêro. Weçînayîşî ra ver 1ê Gulane Roja Kedkaran a Dinya yena pêşwazîkerdiş. Şaro ke bi serran o binpaykerdişan vera feqîr beno, emser binê veristîya krîzê ekonomîye de do şêro 1ê Gulane û hêzo ke uca ra bigêrî do bibê 14ê Gulane serê sindoqan.

 

Endama Sendîkaya Karkerê Weşîye yê Şorişgêr û Karkerê Weşîye (Dev Saglik-Îş) Reyhan Tufekçîye derheqê 1ê Gulane û problemê cinîyan de qisey kerd.

 

Reyhane dîyar kerd ke serra 1992yî ra heta nika sey karkera weşîye xebitîyena, rewşa karkeran her tim zehmet bîya, la no 20 serrî yo ke krîzê giranî reyde giran bîya. Reyhane nê çîyan ard ziwan: “Sermayedar her ke şî çimsûre bî. Bi taybet demê peyênan de ma ser o ra bîyayîşê xo domnenê. Bifikirine meaşê asgarî qaseyê kîra yo. Binpaykerdiş û feqîrî her ke şino giran beno. Eke vernîya nê çîyî nêro girewtiş û rêxistinbîyayîş çinî bibo do ê nêvinderê.”

 

'Bar serê milê karkeran de ameyo barkerdiş'

 

Reyhane tewr peynî wina vat: “Îqtîdar û sermayedarî her ke şino hêrişê kedkar û karkeran kenê. Ma nêeşkenê rapor zî bigîrê. Ma vera saetanê kar û meaşê kêmî têkoşîn danê. Bar serê milê cinîyan de ameyo barkerdiş. Pandemî de saetê karî zêde kerdî. Meaş kêm kerdî. Kelepulê pawitişî nêdayî. Heme bar serê milê karkeran de bar kerdî. Ma karker û kedkarê cinîyî vera heme probleman û vera nê caardişanê serdestan yê camêrdî de têkoşîn danê. Mi kifş kerd ke binpaykerdiş serdestîya camêrdî qeder nîyo. Mi rayîrê têkoşînî dî. Goreyê mi ganî peynîya binpaykerdiş û zextan bêro ardiş. Ganî îqtîdarî teslîmê şarî bêro kerdiş û seba caardişê nê çîyî ma do ê Gulane de raşteyan de bê.”