Melîke Aydin 

 

ÎZMÎR - Partîya Çep a Keske seba asayîşê sindoqan bigêra xebatan domnena. Namzeda Îzmîrî ya Partîya Çep a Keske Semra Kiratliye da zanayîş ke destbendkerdişî seba asayîşê sindoqan şikan virazo zî şar qerardar o û vang kerd ke wa hemwelatijî hetê asayîşê sindoqan de paştîdayîş bidê. 

 

Çarçeweya tehqîqatê Serdozgerîya Komare ya Amedî de 21 bajaran de operasyon dîya destpêkerdiş. 25ê nîsane de polîsan merkezê ci Amed Mêrdîn, Sêrt, Çewlîg, Wan, Şirnex, Êlih, Dîlok, Riha, Bursa, Stenbol, Îzmîr, Mersîn, Mûş, Bedlîs, Colemêrg, Osmaniye, Sêwas, Meletî, Semsûr û Anqara de eşt xeylêk adresan ser. Netîceyê operasyonî de xeylê rojnameger, avûkat, sîyasetmedar û hunermendî ameyî destbendkerdiş û dest ronîya kitab û malzemeyê dîjîtalî yê kesê ke ameyî destbendkerdiş ser. Partîya Çep a Keske vera destbendkerdişan ke asayîşê sidoqan zî dekeno tehluke de xebatan domnena.

 

Partîya Ameyoxî ya Çep a Keske (Partîya Çep a Keske) reya yewineyo ke dekewena weçînayîşî. Coka ra zî nêeşkena wezîfedarê sindoqî bivejna, la sindoqan de û awanîyê ke tede raydayîş virazîyeno de herêma sindoqan ke temamê sindoqan de eşkena çarçeweya cipersayîşî de cigêrayîş bikera û îtîrazê heyetê weçînayîşî yê qezaye bikera. Namzeda herêma yewine ya Partîya Çep a Keske ya Îzmîrî Semra Kiratliye da zanayîş ke înan xebata muşahidîye domenê.

 

Ganî zerrîwazê weçînayîşî herêma sindoqan nêteriknê

 

Semraye dîyar kerd ke lazimîya şarê Tirkîya bi bedilnayîşî esta û weçînayîş xeylê muhîm o. Semraye wina dewam kerd: “Seba xurtkerdişê parlementoye û awankerdişê komara demokratîke weçînayîş xeylê muhîm o. Seba asayîşê sindoqan xebata muşahîdîye dewam kena. Ma bi partîya muxalefet û hêzê demokrasiye reyde mîyanê hemkarîye de yê ke netîceyêk raşt ê fermî bikewê raşteyan. Nê weçînayîşî de yew raye zî muhîm a. Coka ra zî paştîdayîşê zerrîwazan xeylê muhîm o.”

 

‘Ma do destur nêdê xîleyan’ 

 

Semraye ard ziwan ke Partîya Çep a Keske reya yewine ya ke kewena weçînayîşî û domna: “Wezîfedarê sindoqan nêdayî. Coka ra şar şikin o. Ma hîssgerîya şarî ra bawer kenê. Tecrubeyêk ma esto. Tabî şike ma estî la ma bawerîya ma zî esta. Do şarê ma destur nêdo xîleyan. Qerardarîyêk winasî asîyena.” 

 

‘Her kes wa serê wezîfeyê xo de bo’

 

Semraye da zanayîş ke ganî her kes serê wezîfeyê xo de bo û wina vat: “Destbendkerdişê 152 welatijan ke ci de avûkat, rojnameger û sîyasetmedarî estbî, bi amancê asayîşê sindoqan ame kerdiş. Her partîyêke wayîrê berpirsyarî ya ke sindoqan bipawê. Hemverê Partîya Çep a Keske de tedayî yenê kerdiş û şaîbe yenê kerdiş. Embazanê ma tepişnenê û vanê qey do xebatan qels bikerê. La her zerrîwaz sey xebatkarê partîye şuxulêno û têkoşîn keno. Her kes seba çinbîyayîşê embazan nêdê hîskerdiş serê wezîfeyê xo de yê. Şar hemverê destbendkerdişan bêşik bi reaksîyon o la hetê girewtişê asayîşê sindoqan de xeylêk bi qerar o.” 

 

Wa welatijî beşdarê xebatan bibê

 

Semraye tewr peyîn qiseykerdişê xo de dîyar kerd ke prosesêk tarîxî ra derbaz benê, bawer kenê ke do no  rejîmê otorîter şêro û wina qedêna: “Şar her sewîyeya weçînayîşî de hem hetê xebatan de hem hetê asayîşê rayan de bi qerar ê. Ma venga pêro welatijan kenê hem xebatê weçînayîşî de hem zî asayîşê sindoqan de wezîfeyê xo bigîrê.”