ANQARA - Rêxistinê çapemenî û huqûqî destbendkerdişê ke 21 merkezan de ameyî kerdiş, şermezar kerdî û vatî: "Rojnamegerê kurdî her rey benê hedef. Ganî kesê ke ameyî destbenfkerdiş, serbest bêrê veradayîş." 

 

Çarçewaya cipersayîşê Serdozgerîya Komare ya Amedî û serê qerarê 3ine Dadgerîya Cezayê Sulhî ya Amedî, mîyan de rojnameger, sîyasetmedar, avûkat, hunermend û sendîkawanî zî seba 216 kesan qerarê destbendkerdişî ame dayîş. Netîceyê sereştişê keyeyan 128 kesî amebî destbendkerdiş. Muxabîra ma Bêrîtan Canozer û rojnameger Abdurahman Gok, Mehmetşah Orûç û Remzî Akaya ke çarçewaya operasyonî de amebî destbendkerdiş, dimayê îfadeyê înan ê dozgerî bi waştişê tepiştişî sewqê Dadgerîya Cezayê Sulhî ameyî kerdiş. Dadgehe derheqê Berîtan, Abdurahman Gok, Mehmetşah û Remzî de qerarê tepiştişî da.

 

Reaksîyon û nêrazîbîyayîşê hemverê destbendkerdişan dewam keno. Temsîlkarê rêxistinê çapemenî û huqûqî reaksîyon vera destbendkerdişan mojna û tepiştişan da. 

 

Midûra CFWIJî Damla Tarhan, reaksîyon vera tepiştişan mojna û vat: "Tirkîya de merdim nêeşkeno qalê azadîya çapemenîye bikero. Bi serran o rojnamegerî seba kar û barê xo yenê cezakerdiş. Bi xususî zî rojnamegerê kurdî seba nasnameyê xo hedef yenê ramojnayîş. Her roja ke derbaz bena hûmara tepiştişê rojnamegeran zêde bena. Ganî her kes hemverê nêheqî vengê xo berz bikero û nêrazîbîyayîş bimojno. Ganî lezî rojnamegerê ke ameyî tepiştiş serbest bêrê verafayîş.”

 

‘Ma kîşte rojnamegeran de yê’

 

Merkezê Azadîya Medya û Çapemenîye ya Ewropayî  (ECPMF) Koordînatorê MFRRî Gurkan Ozturan wina vat: “Ma xeylê rey muşahadeyê polîtîkayê pelçiqnayîşî û tedayê sîstematîk kerdî. No hîrê rey o bi hawayêkê komî rojnamegeran destbend kenê. Medya seba heqê komelî û azadî elzem o. Ma vengdayîşê xo yê seba veradayîşê rojnamegeran reyna kenê. Ma do tim mîyanê paştdayîşî de bê. Ma kîşte rojnamegeran de yê.”

 

‘No operasyonê qirkerdişê sîyasî yê vernîya weçînayîşî yo’

 

Avûkate Çigdem Kozan da zanayîş ke no operasyonê qirkerdişê sîyasî yê vernîya weçînayîşî yo û wina vat: “Vernîya weçînayîşî rojnameger, siyasetmedar, hunermendî ameyî destbendkerdiş û tepiştiş. Îqtidar wazeno hetêk komelî krîmînalîze bikero. Reyna avûkatê endamê OHDyî zî destbendkerde yê. Wazenê faliyetê avûkatî krîmînalîze bikerê. Ganî pêro hetê komelî bêhiqûqî ra vajê nê.”