Marta Somek

 

STENBOL - Sereka Pêroyî ya DÎSKî Arzu Çerkezogluye da zanayîş ke do kedkarî 14ê Gulane de mabenê rejîmê otorîter û demokrasîye de tercîhêk bikerê û vat: “Ma veng danê heme kedkar, karker, ciwan, cinî, kesê ke wayîrê nê welatî vejîyenî û vanê ke 1ê Gulane de raşteyan de bibêne.”

 

Şaro ke vayeyan vera nêeşkeno tu çîyêk bigêro, ameyo verê çinîbîyayîşî. Wendekaran ra heta cinîyan, kedkaran ra heta karkeran mesaj danê ke nê weçînayîşê 14ê Gulane de îqtîdarê AKP-MHPyî bişirawê.

 

Karker û kedkar xo hadre kenê ke xoverdayîş û têkoşînî 1ê Gulane Roja Paştîdayîş û Kede de biqîrê.

 

Bale ant serê Raşteyê Taksîmî

 

Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Karkeranê Şorişgêran (DÎSK), Yewîya Odeyê Muhendis û Mîmaranê Tirkan (TMMOB), Yewîya Tabîbanê Tirkan (TTB) û Yewîya Hekîmê Diranan a Tirkîye (TDB) 12ê Nîsane de bernameyê 1ê Gulane eşkera kerdî. 

 

Sereka Pêroyî ya DÎSKî Arzu Çerkezogluye da zanayîş ke adresê 1ê Gulana emserrî Raşteyê Taksîmî yo. Arzuye derheqê 1ê Gulane de ajansê ma rê qisey kerd.

 

‘Ma do tercîhê xo bikerê’

 

Arzuye da zanayîş ke 1ê Gulane zag muhîm a û wina vat: “Weçînayîşo ke do 14ê Gulane de pê bêro seba ameyoxê Tirkîya xeylê muhîm o. Ma do weçînayîşê 14ê Gulane de mabenê rejîmê otorîter-tedawer û demokrasîye de tercîhêk bikerî. Weçînayîş ra ver 1ê Gulane esta. 1ê Gulane roja yewî û têkoşînî ya. Heme karker, kedkar bi waştiş, hedef û coşê xo na roje de yenê têkişt. Ma 1ê Gulane de do îfade bikerî ke wayîrê keda xo bivejê.”

 

‘Ma do 1ê Gulane de raşteyan de têkişt de bibê’

 

Arzuye qiseykerdişê xo yê peyênan de nê çîyan ard ziwan: “Ma veng danê her kesî ke 1ê Gulane de bi coşêk gird û bi waştişê xo têkişt de bibê. Pîya biherikî raşteyan. Berpirsîyarîyêka gird kewena serê milê her hetê komelî. No welat do nê tabloyî bibedilno. Wa her kes na roje de raşteyan de bo. Hêz û îmkan destê ma de yo. Ma veng danê heme kedkar, karker, ciwan, cinî, kesê ke wayîrê nê welatî vejîyenî û vanê ke 1ê Gulane de raşteyan de bibêne.”