MERKEZÊ XEBERAN – Syrîzayî reaksîyon vera destbendkerdişan mojna û vat, “Ma nê bîyayîşî bi endîşeyêk pîl taqîb kenê.”

 

Koalîsyonê Çepî yê Radîkalê Yunanîstanî-Tifaqê Averperwer (Syrîza) reaksîyon vera operasyonê qirkerdişê sîyasî mojna ke roja 25ê Nîsane d 21 bajaran de hemverê kurdan de amebî kerdiş.

 

Beşê Karê Ewropayî û Mîyanneteweyî yê Tifaqê Averperwer SYRIZAyî dîyar kerd ke ê bi kesê ke ameyê destbendkerdişî reyde mîyanê paştdayîşî de yê û bale ant serê operasyonê qirkerdişê sîyasî yê vernîya weçînayîşê 14ê Gulane de pê ame.

 

Eşkerayîye de wina ame vatiş: “Vernîya weçînayîşî destbendkerdişê rojnamegeran, avûkat, hunermend û endamê Partîya Çep a Keske, zirar dano prosesê weçînayîşî yê bêproblemî. Ma nê averşîyayîşan bi qesawetêk pîl taqîb kenê.”