Rozerîn Gultekîn

 

STEBNOL - Namzeda Partîya Çep a Keske Kezban Konukçu Koke derheqê 1ê Gulane û sozê ke Partîya Çep a Keske daya kedkaran de qisey kerd û dîyar kerd ke butçeya ke şerî rê yena cîyakerdiş do kedkaran rê bêra cîyakerdiş û vat partîya înan seba kedkaran partîya tewr raşte ya.

 

Kedkarî 1ê Gulane Roja Paştîdayîş û Kede rê xo hadre kenê ke têkoşînê xo bikerê yew û raşteyan de bêrê tekişt. 1ê Gulane emserr weçînayîşî ra ver yena pîrozkerdiş û kedkar û karkerî xo hadre kenê ke bibê cewabê weçînayîşî û coka ra do raşteyan de bibê.

 

Namzeda herêma yewine ya Stenbolî ya Partîya Çep a Keske Kezban Konukçu Koke dîyar kerd ke raşteyê 1ê Gulane hetê kedkarî cewab bidê îqtîdarî ra xeylê muhîm a.

 

‘Wexto ke rejîmê yew camêrdî şêro do kedkarî asan bibê’

 

Kezbane da zanayîş ke 1ê Gulane roja paştîdayîşê bi kedkar û karkeran reyde heme dinya de yena pîrozkerdiş û karkerî waştişê xo anî ziwan. Kezbane wina vat: “1ê Gulane emserr binê veristîya erdlerz û coşê weçînayîşî de yena pîrozkerdiş. Ma sey Partîya Çep a Keske seba karker, kedkar, feqîr, heme bawerî, cinî, şarê kurdî û ciwanan xo 1ê Gulane rê hadre kenê û ma do waştişê xo zelal bîyarê ziwan û xebatan rayra benê. Nimune erdlerz tesîrêk gird serê feqîr û kedkaran de viraşt. Merdim bêçare mend. Coka ra weçînayîş seba şaran bî babeta cuye. Rejîmê yew camêrdî ra xelisîyayîş nuqtaya muhîma ke vernîya ma de ya. Coka ra zî weçînayîş firsedêk muhîm o. Wexto ke rejîmê yew camêrdî şêro do kedkarî asan bibê.”

 

Ganî bi coşê 8ê Adare û Newroze vejîyê raşteyan

 

Kezbane dîyar kerd ke dîmenê 8ê Adare û Newrozan de mesajê derheqê netîceyê weçînayîşî de yê û vat: “Do şar bi ruhê 8ê Adare û Newroze vejîyê raşteyê 1ê Gulane. 1ê Gulane vernîya weçînayîşî yo. Do kedkarî bi waştişê xo raşteyan de bê. Kapîtalîzm beno sebebê binpaykerdişê kedkaran. Ma sey Partîya Çep a Keske seba çareserîya problemê rayîrê hîrêne mojnenê. Ma do na rewşe 1ê Gulane de reyke bîn şarî rê qal bikerê. Bipeynîbîyayîşê binpaykerdişî, rayîrê hîrêne de derbaz beno.”

 

Do butçe kedkaran rê bêro visnayîş

 

Kezbane dewam de wina qal kerd: “Ma projeyê xo yê derheqê kedkaran de pêvînayîşê înan reyde awan kenê. Derheqê asayîşê xebate, garantîya  karî de polîtîkayê ma estê. Partîya Çep a Keske soz dana karker û kedkaran. Karkerî înan ra waştişan kenê. Derheqê keda cinîyan de polîtîkayê ma estê. Derheqê heqê kede de do polîtîkayê ma bibê. Butçeyê ke şerî rê yeno cîyakerdiş, do seba kedkaran bêro cîyakerdiş.”

 

 ‘Karkeran rê eleqeyêk pîl o’

 

Kezbane dîyar kerd ke Partîya Çep a Keske seba samimiyet mojnenê, hêvî dana şarî û vat: “Karkerî eleqeyêk pîl mojnenê. Ma havzayê karkeran de vilawikan vila kenê, bi coşêk pîl ma pêşwazî kenê. Pêwa nê xebatê ma estê. Vurnayîşê tenê bi sindoqan mumkin nîyo. Ganî têkoşînê şarî ewam bikero. Seba welatêk azad ke merdimî eşkenê ci de biciwîyê, ma venga her kesî kenê ke biherikîyê raşteyê 1ê Gulane.”