Şehrîban Aslan

 

AMED – Hatîce Çakmaka ke 30 serrî yo tepişte ya û nika zîndanê Tîpa Lyî yê Alanyaye de bi bahaneye ‘poşmanî’ qebûl nêkerde înfazê aye ame veşênayîş, tehlîyekerdişê aye 6 serran ame taloqkerdiş. Dayîka Hatîceye, Cahîde Çakmake qisey kerd û dîyar kerd ke bade hende serrî û vînîkerdişan ma do senî vajê ‘ma poşman ê.’

 

Tepişteya bi nameyê Hatîce Çakmaka ke zîndanê Cinîyan yê Tîpa Lyî yê Alanyaye yê Antalya de tepişteya înfazê aye ame veşênayîş. Hatîce serra 1993î de ameye tepiştiş û Mehkemaya Asayîşê Dewlete (DGM) Amed de cezaya muebetî daye û 25ê Adare de înfazê xo yê 30 serrî dekerd. Serdozgerîya Komare ya Alanyaye cezaya hucreye ya serranê verênan ya Hatîceye kerd bahane û 6 serran tehlîyekerdişê aye taloq kerd. Avûkata Hatîceye dîyar kerd ke do îtîraz bikerê. Dayîka Hatîceye Cahîde Çakmake da zanayîş ke kênaya aye 30 serrî yo tepişte ya û bi kêfî nîna tehlîyekerdiş. 

 

‘Kênaya mi nêverdenê’

 

Cahîdeye da zanayîş ke aye merdimê Fahrîye Ceylane ya ke înfazê aye ameybî vêşanayîş a û wina vat: “Qey tutanê ma nêverdenê. Cezaya înan qedîyaya. Emrê înan zîndan de derbaz bî. Kênaya mi xeylê zîndanan de mend. Nika zî Alanyaye de ya. Ez zî nêweş a. Ez çimanê xo ra di reyan amelîyat bîya. Ez do senî şêra pêvînayîşê kênaya xo. Tewr peynî ez hamnanî de şîya. Mi vatêne do biverdî la înfazê aye vêşnayî.”

 

‘Ma do senî vajê ma poşman ê’

 

Cahîdeye vat ke kênaya aye 30 serrî yo zîndan teda vînena û wina dewam kerd: “Ezîyet bi ma kenê. Ma lazimîyê tutanê xo danê la nika nêgînê. Poşmanî bi Hatîce danê ferzkerdiş. Aye rê vatî vaje ‘Ez poşman a’. Ma do senî vajê ‘Ma poşman ê’. Hende vînîkerdişê ma estê. Hende serrî zîndan de derbaz bî. No wijdan o acaba? La no çî zilm o.”

 

'Teza bi dewijan kenî’

 

Cahîdeye dewamê qiseykerdişê xo de nê çîyan ard ziwan: “Ma wexto ke dewe de bî teda bi ma kerdêne. Domanê mi zilm qebûl nêkerd. Ma dewa Hecîyê Kurmanca ya Bismilî de bî. Leşker ameyêne zext bi ma kerdêne. Vatêne terorîst estî. Îşkence û zilm bi ma kerdêne.”

 

 ‘Ma tepîya game nêerzenê’

 

Cahîdeye wina qedêna: “Hatîce Bedlîs de ameye tepiştiş. 36 rojan îşkence dî. Kênaya mi badê hende çîyan do senî vaja ez poşman a. Ma rayîrê tutanê xo ra şinê. Ma tutanê xo pey de yê. Se kenê wa bikerê ma tepîya game nêerzenê.”