QERS - Hemşaredara Qersî ya ke herinda aye de qeyûm ame tayîn kerdiş Şevîn Alacaye dîyar kerd ke badê 14ê Gulane hêvîya ma esto ke Tirkîye de prosesê demokratîke dest pêbikero û vat: "Ma do sey Partîya Çep a Keske bi sîstemê hemserekatî û pratîkanê xo yê verênan bivejê vernîya şarî.”

 

Weçînayîşê 31ê Adara 2019î de Qers de hemşaredarê Partîya Demokratîke ya Şaran (HDP) bi rayanê şarî ameyî weçînayîş û badê demêk qeyûm tayînê herinda înan ame kerdiş. Hemşaredare Şevîn Alacaya ke qeyûm tayînê herinda aye ame kerdiş, dîyar kerd ke înan ra ver tu xizmetêk nêameybî kerdiş û vat ke weçînayîşê 2019î seba bajar çîyêko yewine bî. 

 

Temsîlkarîya seyyewbînan

 

Şevîne da zanayîş ke înan şaredarî bi deynêk cîdî dewr girewtî û vera hende deynan reyna zî dest bi xizmetê şaredarîye kerd û xeylê projeyê neweyî zî kerdî cuye. Şevîne ard ziwan ke tewr zêde yê ke mexdurîyet cuyayêne cinî bî û wina vat: “Badê qezenckerdişê weçînayîşî bajar de hewayêk cîya awan bî. Hem xizmetê şaredarîye hem zî temsîlkarîya seyyewbînan pê ame. Partîya ma ra hêvî zêde bî.” 

 

Şevîne dewamê qiseykerdişê xo de bale ant sîstemê hemserekatîye ser û vat: “Weçînayîşê 2019î de reya yewine Qers de sîstemê hemserekatîye pê ame. No bajar musayeyê şaredarê camêrdî bî. La bi hemserekatîye no raşte ra wedarîya. Cinîyî nêeşkayêne problemanê xo bîyarî ziwan. Badê hemserekatîye cinîyî waştişê xo şaredarîye rê bi asanî resna.”

 

Projeyê cinîyan dekewt cuye

 

Şevîne dîyar kerd ke deynê şaredarîye vernîya xizmetê ma de bî asteng la vera hende çîyan ma bahane qebul nêkerd û wina domna: “Ma projeyê seba cinîyan kewt cuye. Bajar de betalî sewîyeyêka cîdî de ya. Yê ke tewr zêde tesîr benî cinî yê. Ma seba cinîyan Mor Kafe ke eşkayêne berardiş xo tîya de biroşê awan kerd. Ma Bazarê Keda Cinîye awan kerd. Ma bi merkezê paştîdayîşê cinîye xo resna cinîyan. Ma binê banê şaredarîye de merkezê Paştîdayîşê Cinîye ya girêdayeyê Mudirîyeta Cinîyan awan kerd. No xeylê muhîm bî.”

 

Qeyûmî ewil hêrişê destkewtişê cinîyan kerdî

 

Şevîne ard ziwan ke badê demêk kilm qeyûm tayînê şaredarîya înan bî û senî ke qeyum ame destkewtişê cinîyan hedef girewt û vat: “Xebatê ma yê cinîyan ameyî peynîkerdiş. Merkezê cinîyan, Kafeya Mor ameyî girewtiş. Cinî reyna hepsê keyeyî bî. La badê 14ê Gulane hêvîya ma esta ke Tirkîya de prosesê demokratîke dest pêbikero. Rayîrberê herêmî payê tewr muhîm yê demokratîkbîyayîşî yo. Demokratîkbîyayîş herême ra dest pêkeno. Ma do sey Partîya Çep a Keske bi sîstemê hemserekatîye û pratîkê xo yê verênan bivejê vernîya şarî.”

 

Seba Qersî projeyê ma estê

 

Şevîne qiseykerdişê xo wina qedênaye: “Seba ekonomî, turîzm, îstîhdam û cinîyê Qersî xeylê projeyê ma estê. Eke wext bêro ma do yew bi yew eşkera bikerê. Bajar de nasnameyê cîya cuyenê. Ma do bi şaredarîya xo ya şarî reyde bi STKyan reyde projeyanê xo hîra bikerê û xebata xo dewam bikerê.”