Rojda Aydin  

 

MÊRDÎN – Sîyasetmedarê cinî derheqê tecrîdî yê hemverê Rayberê PKKyî Abdullah Ocalanî de qisey kerdî, ardî ziwan ke îqtîdarê AKPyî seba çareserî tu game nêerzeno. Cinîyan dîyar kerd ke seba azadî, aştî û şikinayîşê tecrîdî lazim o nê weçînayîşî de îqtîdarê AKPyî bierşawê û vatî: Tecrîd bişiko do aştî zî bêro welat. Seba ke aştî bi Birêz Ocalanî mumkun a.”        

 

Rayberê PKKyî Abdullah Ocalan 24 serrî yo binê tecrîdêk giran de yeno tepiştiş û di serrî yo bi tu hewa ne avûkatî û ne zî keyeyê ey eşkeno agahî ci ra bigîro. Avûkat û keyeyê Abdullah Ocalanî seba pêvînayîşî her hewte serdayîşê Serdozgerîya Komara Bûrsayî kenê la pêro muracatê înan bêcewab manenê. Tecrîd ke ewro pêro wareyan de vila bîyo û tesîrê xo ramojneno, babeta sereyîn ê şarê kurdî yo. Bi nê reyde Tirkîya û Kurdistan ewro ver bi Weçînayîşê Pêroyî ke do 14ê Gulane de bêro kerdiş rê şinê. Demê rayraberdişê xebatê weçînayîşî de tecrîdo girankerde rê bale yeno antiş û sewbîna seba çareserî şikinayîşê tecrîdî û pêvînayîşê bi Abdullah Ocalan reyde yeno mojnayîş.

 

Hemşaredara qezaya Dêrîkî ya Mêrdînî Mulkiye Esmez û aktîvîsta Tevgerê Cinîyanê Azadan (TJA) Ayten Esmez zî derheqê babete de qisey kerd.

 

‘Îqtîdar seba çareserî tu game nêerzeno’

 

Mulkiye Esmez, dîyar kerd di serrî yo bi tu hawayî agahî Abdullah Ocalanî ra nîna girewtiş û vat: “Heta ewro îqtîdar seba çareserî tu game nêerzeno. Ma wazenê aştîyêke bi rûmet bêro nê welatî û komelî. Birêz Ocalanî verê vatibi, ‘ez seba çareserî amade ya’ Labelê kesî goş nêda nê vengdayîşî. Tecrîdo ke ewro serê Birêz Ocalanî de ameyo kerdiş, bi nê reyde no tecrîd serê pêro zîndanan û heme şaran de yeno kerdiş. No bi serran o ma pêro nê tecrîdî ciwîyenê û ma zî binê nê tecrîdî de yê. Demo ke tecrîdê serê Birêz Ocalanî de ame şikinayîş do demê serê pêro komelê Tirkîya zî bêro şikinayîş. No tecrîd serê şarê kurdî de nêkeno, sewbîna tesîrê serê şarê tirk, suryan, erep û çerkez zî keno. Çareserî bi tenê awankerdişê prosesê çareserî yo. Sewbîna no problem nîno çareserkerdiş. Eynî wextî de vernîya ma de weçînayîş esto eke no îqtîdar şêro, kesê ke bêro de ganî çareserîyêk newe bêro kerdiş. Eke pêvînayîş bi Birêz Ocalanî reyde bêro kerdiş, ez bawera ke pêro şarê ma seba çareserî amade yo.”

 

‘Seba şikinayîşê tecrîdî weçînayîş muhîm o’

 

Mulkîye, da zanayîş ke no sîstem 21 serrî yo bi hawayêke sîstematîk rayra beno û vat: “Îqtîdarê bîyaye bi talankerdiş, feqîrî, çinbîyayîş, bi tepiştiş û her het hewl yeno dayîş ke rayra bero. Êdî şar zî bi 21 serrî yo îqtîdaro ke polîtîkayê keno bêzar bîyo. Nika zî  vernîya ma de weçînayîş esto. Ma sewîyeya tewr peyîn de vindertê. No weçînayîş çiqas seba şarê ma rê muhîm bo zî, seba temamê şarê Tirkîya rê zî muhîm o. Nê weçînayîş de prosesêk newe bêro destpêkerdiş û no îqtîdar bêro vurnayîş. Bi serran o şar yeno çinkerdiş û bi feqîrî, zilm, talankerdiş, koçberî û pêro çî reyde rî bi rî mendî. Memûrê Tirkîya zî seba polîtîkayê îqtîdarî nêeşkenê tîya biciwîyê û koçberê teberê welat kenê. Seba nê zî ma reyke bîn vanê do şarê kurdî prosesêk newe yê aştîyane rê amade yê. Ganî pêro şarê bînî zî hemverê talankerdiş, feqîrî, tecrît, kiştiş, tacîz û tecawuzî ma reyde mil bidê yewbînan û îqtîdar bivurnê. Komel zî vano no îqtîdar do şêro, eke nêşêro do tewr xirab bibo. Ganî ma nê îqtîdar bierşawê. Seba azadî, aştî û weşîye ma gamê xo bierzê. Xususî şarê ma seba şikinayîşê çi game lazim bo, bierzo. Seba nê zî weçînayîş de no îqtîdar do şêro, seba wedaritişê tecrîdî prosesêk newe bêro destpêkerdiş. Seba  wedaritişê çareserî ganî şarê ma weçînayîş de cewab bido.”

 

‘Heta îqtîdarê AKPyî nêşêro çareserî nîna welat’

 

Ayten Esmez zî dîyar kerd ke tecrîdê serê Abdullah Ocalan ameyo girankerdiş tesîrêk pîl serê cinîyan û şarê kurdî de keno û vat: “Bi serran o ma vanê ganî no tecrîd bêro wedaritiş û pêvînayîşî bêrê kerdiş. Bi di serrî yo bi Birêz Ocalanî reyde bi tu hawayî pêvînayîşî nînê kerdiş. Birêz Ocalan seba çareserî amade yo. La îqtîdarê AKPyî vera ke prosesê çareserî bido destpêkerdiş, verê xo dano şer. Nê reyde wazenê emrê xo derg bikerê. Nêwazenê ke aştî û azadî bêro nê welatî. La ma do bi nê weçînayîşî tecrîdî bişikinê. Coka zî no weçînayîş seba ma xeylêk muhîm o. Azadî bi Birêz Ocalanî reyde mumkin o. Seba nê zî ganî pêro şar mil bido milê yewbînan û hemverê nê de vinderê. Seba çareserî ganî destpêk de no îqtîdaro bîyaye şêro û ma vengê xo bikerê yew. Heta n îqtîdar nêşêro çareserî nîno nê welatî. Eke îqtîdar şêro do çareserî zî bêro nê welatî. AKP şêro do pêro çî weş bibo.”

 

‘Ma do serbikewê’

 

Aytene, tewr peyîn wina vat: “Ma bi nê weçînayîşî wazenê ke huqûq û edaletêk bêro nê welatî. Ewro Kurdistan û Tirkîya de ne huqûq û ne zî heq mendo. Bi nê weçînayîşî ma do heq û hûqûq bîyarê û tecrîd bişikênê. Seba ke tecrîd zî parçeyêk bêhuqûqî yo. Şikînayîşê tecrîdî vernîya rayîrê çareserî zî akeno. Ma wazenê no tecrîd hem serê Birêz Ocalanî û hem zî heme şaran peynî bibo. Ma do serbikewê û tecrîd bişikinê.”