RIHA - Bi wesîleya roja erefeyî keyeyê Şenyaşarî şî  serdayîşê gorê endamê keyeyê xo yê ke ameyî qetilkerdiş. Destûr nêame dayîş ke Ferît Şenyaşar serê gorî de eşkerayîye bido.

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê Hezîrana 2018ine de qezaya Pirsûsê Rihayî hêrişê keyeyê Şenyaşarî kerdibi. Netîceyê hêrişî de mêrdeyê Emîne Şenyaşar û di lajê aye amebî qetilkerdiş. Nê ser de Emîne Şenyaşar û lajê aye Ferît Şenyaşar 9ê adara 2021ine de vernîya Edliyeyê Rihayî de dest bi çalakîya Nobeta Edaletî kerdibî. Çalakîya keyeyê Şenyaşarî roja 759ine de dewam kena.

  

Emîne Şenşayar, pêwa tutanê xo bi wesîleya roja erefeyî şî Goristanê Keyeyê Pirsûsî û gorê tutanê xo Adil û Celal Şenyaşarî û mêrdeyê xo Haci Esvet Şenyaşarî zîyaret kerd. Keyeyî, serê gorî de dua kerd. 

 

Ferît Şenyaşar, waşt ke serê gorê bira û pîyê xo de qiseykerdişêk kilm bikero la polîsan asteng kerd. Polîsan, kamereyê muxabîrê Ajansê Mezopotamyayî (MA) girewtî û nêverdayî ke dîmenan bianco. Keyeyê Şenyaşarî zî reaksîyon vera polîsan mojna û eşkerayîye dekewtişê goristanî de da. 

 

Ferît Şenyaşarî, wina vat: “Ma ewro seba wesîleya roja erefeyî ameyî goristan. Hêzê asayîşî ke qanûn dayê hetêk û goreyê fermanê serdestan têgêrenê, nêverdayî ke dayîke dejê xo bianca. Îqtîdaro ke zulm keno verê vînîkerdişî yo. Ma paweyê 14ê Gulane yê. Do no zîhnîyetê ke hende nêheqîyan keno, zulm keno, qanûnan binpay keno û parlamenteran paweno do vînî bikero û do hukmê xoser û bêhet bêro. Yê ke nê qirkerdişî kerdî zî do hemverê hukmî yê xoserî de hesab bidê.”

 

Keye, dimayê serdayîşê goristanî de seba domnayîşê  Nobeta Edaletî ver bi Edlîyeyê Rihayî de kewtî rayîr.