ANQARA - Avûkat Merve Çîftçîye dîyar kerd ke weçînayîşê 14ê Gulane de partî reyna temsîlkarîya seyyewbînan esas nêgêno û wina vat: “Înan sîstemê fermuarî fehm kerd la şaş fehm kerdî. Ma vat wa yew cinî yew camêrd bo. Ma înan vat yew CHP, yew DEVA û yew zî Saadet bo. Siyaset de temsîlkarîya seyyewbînan heqêk demokratîke yo.”

 

Weçînayîşê 14ê Gulane rê demêk kilm mend û partî reyna lîsteyan de kotaya cinîye da temsîlkarîya seyyewbînan bi dest nêfîna. Namzedê cinî kêm ê û yê ke ameyî mojnayîş zî rêza peynî de yê. Zerrîwaza Platformê Cinîyan ya Seba Seyyewbînanîye (EŞÎK) Avûkat Merve Çîftçîye derheqê temsîlkarîya seyyewbînan û sîstemê fermuarî ke şaş ameyo fehmkerdiş de qisey kerd.

 

‘Ma netîce nêgirewt’

 

Merveye dîyar kerd ke EŞÎKî derheqê namzedanê cinîyan de xebat rayra berdêne û ewnîyaya ke cinîyê namzedî yê ke ameyî mojnayîş cayê ke ameyî mojnayîş ra yê yan nê. Merveye wina vat: “Vîşêrê Partîya Çep a Keske û TÎPî cinî zaf kêm ameyî mojnayîş. Partîya Çep a Keske de daraxê cinîye sera 42 yo û partîya muxalefetî ya CHPyî de zî sera 26 o. Babeta bîn zî no yo ke daraxê cinîyê ke yenê weçînayîş û camêrdê ke yenê weçînayîş yew nîyo. Ma sey EŞÎKî derheqê temsîlkarîya seyyewbînan de mektube partîya sîyasî rê şirawit. La ma çîyê ke waştêne nêgirewt.”

 

‘Şaş fehm kerdî’

 

Merveye eşkera kerd ke mektuba ke şirawitî de qala sîstemê fermuarî kerdî û meclîsêk senî wazenê kerdî. Merveye wina dewam kerd: “Înan sîstemê fermuarî fehm kerd la şaş fehm kerdî. Ma vat wa yew cinî yew camêrd bo. Ma înan vat yew CHP, yew DEVA û yew zî Saadet bo. Sîyaset de temsîlkarîya seyyewbînan heqêk demokratîke yo. Çîyo ke ma waştêne fehm bikerê la reyna bi ziwanê serdest ê camêrdî fehm kerdî.” 

 

‘Hewl danê heqanê cinîyan bikerê babeta bazarê tîfaqî’

 

Merveye dîyar kerd ke mektube de 5 waştişê lezkî yê sey pêameyîşê Peymana Stenbolî, wezîrîya cinî, seyyewbînanîya îstîhdamî, seyyewbînanîya perwerdeyî, heqê hemwelatîbîyayîşî û heqê cinîyan yê Qanûnê Medenî taleb kerdî û vatî ke ganî tesilî 15ê Gulane de pê bêro. Merveye vat ke çi heyfo ke her çend ke înan ser de vinderî zî tepîya kewenê û tewr peynî erdlerzî ra ver waştişê înan bedilnayîşê destûrê bingeyîn bî û vat: “Ma her tim têkoşîn kenê. HUDA PAR û Partîya Refaho Newe merdiman kenê şikan. Nika HUDA PAR heqê cinîyan keno babeta bazarîya tîfaqî. Ma hemverê înan de yê. Hewl danê meclîso ke heqê cinîyan keno babeta bazarîye awan bikerê.” 

 

‘Meclîsêk bi xof’ 

 

Merveye bale ant sere lîsteya namzedanê partiyan û ercnayîşê ‘meclîsek bi xof’ kerd. Merveye da zanayîş ke avûkatê kiştoxî ke Şule Çete qetil kerd zî partîya Zaferî ra bîyo namzed û vat: “No tena seba na partîye nîyo. Partîyê bînan de zî esto. Şikinê îstîsmarî estê. Kesê ke îdîayê destdergîye înan ser de estê, lîsteya namzedîye de ca gênê. Ma vînenê ke no goreyê lîyakatê goreyê hêz û camêrdî ameyo kerdiş.

Merveye qiseykerdişê xo yê peyênan de wina vat: “Seyyewbînanî heqêk demokratîk a. Ganî her ca de biba. Erdlerzî de zî cinî hîna zêde têkoşînê bîyayîşî dayî. Temsîlkarîya seyyewbînan heqêk demokratîk a. Ma sey EŞÎKî xebata xo de nê çîyî anê ziwan ser.”