Melîke Aydin

 

ÎZMÎR - Cinî Pîya bi Hêz ê, badê dewaya Denîz Poyraze eşkerayî dabî. Dîdar Gula ke eşkerayî de qisey kerd bi bahaneyê heqeret Wezîrê Karê Zerreyî kerda, derheqê aye de dewa ameye akerdiş. Dîdar Gule dîyar kerd ke aye heqeret nêkerda û bale ant serê sucê ke ameyî kerdiş û seba roniştişê dewaya ke do 21ê êlule de bêra dîyîş vengê paştîdayîşî kerd.

 

Kiştox Onur Gencerî hêrişê hemverê Partîya Demokratîke ya Şaran (HDP) ya Îzmîrî de Denîz Poyraze qetil kerdbî. Dewaya ke ameye dîyîş de cezaya muebetî kiştoxî rê ameye birnayîş la vera heme delîlê raşteyî kesê ke peynîya qetlîyamî de estê nêameyî cigêrayîşkerdiş. Cinî Pîya bi Hêz ê (KBG) ke hem prosesê dewaye û hem zî prosesê cezaye de ca girewtî, badê dewaye Raşteyê Kibrisî yê Şehîdlerî yê Alsancakî de eşkerayî dayî. Dîdar Gule serê nameyê KBGyî eşkerayî wend. Eşkerayîye ra dima polîsan aye taqîp kerd û bi bahaneyê heqeret wezîrê karê zerreyi kerda ameye destbendkerdiş û derheqê aye de tehqîqat ame akerdiş.

 

‘Heqaret çin o raştî esta’

 

Dîdare da zanayîş ke dewaye de xeylê kesê berpirsê qetilkerdişî ameyî xelatkerdiş û coka ra dewaye ra dima eşkerayî dayî û bale ant serê berpirsîyaran. Dîdare wina vat: “Raşte de heqeret çin o. Bi taybetî heqeretêk bi Wezîrê Karê Zereyî, Tayîp Erdoganî nêameyo kerdiş. La serranê peyênan de bîya moda û coka ra merdiman tepişenê. Ma vat Onur Gencerî tena no hedîse organîze nêkerdo. Cinîyêk awanîya partîye de bi çeke ameye qetilkerdiş. Berpirsîyarîya wezîrîya karê zerreyî, serekkomar, emnîyet esta. Ma waşt berpirsî bêrî muhakemekerdiş. Dima ra zî seke mi biremnê destbend kerdî. 

 

‘Hewl danê prosesî bigîrê’

 

Dîdare wina qiseykerdişê xo peynî kerd: “Çîyê ke mi vato sey heqaretêk ke bi Suleyman Soyluyî rê ameyo kerdiş hesibîyayo û dewa ameya akerdiş. No hewldayîşê awankerdişê faşîzmê daîmî yo. Yew Tayîp Erdogan û yê bîn Suleyman Soylu pozîsyono ke her çîyî çinî bikero de yo. Hêrişê her hetî kenê. Ceza danê kiştox û vanê ma serê hedîseyî bigîrê. La ne dewaya Denîze ne zî dewaya kesê bîn yê ke ameyî qetilkerdiş nêqedîyayo. Seba ma dewaye nêqedîyaya. Ez veng dana cinîyan ke 21ê êlule de tewrê roniştişî bibê.”