ANQARA - HDP, Roşanê Çarşema Sor ê Êzidîyan pîroz kerd û hêvî kerd ke bibê mizgînîya azadîye.

 

Verfekê Komîsyonê Şarî û Baweriyan ê Partîya Demokratîk ê Şaran (HDP) Tulay Hatîmogûllari û Tûrgût Oker Roşanê Çarşema Sor pîroz kerdî.

 

Mesajê pîrozbayîye ya HDPyî de wina ame vatiş:  "Çarşema Serê Nîsane yanî Roşanê Çarşema Sor pîroz bo ke hetê êzidîyan ra sey roja destpêkî ya wisarî û roja destpêkî ya serra newe yena pîrozkerdiş.

 

Êzidî o şaro ke seba çand, bawerî û nasnameyê xo 73 reyan qirkerdiş ameyo kerdiş. Qirkerdişo tewr pîl zî  Şengal de ameyo kerdiş. Serra 2014ine ra tepîya ke vernîya çimanê dinya de fermanê 73ine vera înan rawuşt, bi hezaran cinî û tutê êzidî destê çeteyê DAÎŞî de esîr girewte yê û çi heyf zî aqûbetê înan nîno zanayîş.

 

Bi hêvîya ke bibo mizgînîya azadîye ya şarê Êzidî yê qedîm ma Roşanê Çarşema Sor pîroz kenê û hêvî kenê ke bibo wesîleya aştî, azadî û têduştîya temamê merdimayî rê.”