AMED - Rojanê verênan de îdîanameyê derheqê rojnamegeranê tepişteyan ameybî hadrekerdiş û hetê mehkema ra ameybî qebulkerdiş. Îdîaname de rojnamegerî bi bernameyanê ke viraştbî ameyî sucdarkerdiş. Neşe Toprake zî bernameyê ‘Nêrîna li Hunerê’ ra yena muhakemekerdiş.

 

Çarçeweya tehqîqato ke Serdozgerîya Komare ya Amedî dabî destpêkerdiş de 8ê Hezîrane de 18 rojnamegerî ameybî destbendkerdiş û 16ê Hezîrane de nê rojnamegerî ameyî tepiştiş. Îdîanameyê derheqê rojnamegeran rojanê verênan de ame temamkerdiş û şirawîya 4ine Mehkemaya Cezaya Girane ya Amedî. Bado ke dadgeh îdîaname temam kerd, tarîxê yewine yê roniştişî ke do 11ê Temmuze de bêro dîyîş ame dîyarkerdiş. Çarçeweya dosyaye de rojnamegerê ke yenê muhakemekerdiş ra yew zî Neşe Toprake ya. Neşe bernameyê ‘Nêrîna li Hunerê’ ra yena muhakemekerdiş. 

 

Xeberê kultur û hunerî suc ê

 

Îdîaname de deyîra 8ê Adare Roja Cinîyanê Dinya ya koma muzîkî ‘Koma Hêviya Jinên Şengalê’ ya ke bernameyê Neşeye de ca girewtêne suc ame hesibnayîş û reyna xebera raporê sansûrî ya Platformê Bêveng Nêmanê sey delîlê sucî ame hesîbnayîş. Xeylê beşê bernameyî ke tede qewimîyayîşê derheqê kultur û hunerî de ca girewtêne zî îdîaname de ca girewtî. Sewbîna hûmara newe ya Neweya Jin bi manşetê Ronesansê Kurd vejîya. Rojname dîyar kerdo ke rewşa tepişteyanê nêweşan bi polîtîkaya PDKyî yena destgirewtiş. No bî delîlê sucî. Xebera derheqê kitabxaneyê gêrayoxe yê Vakur û Rojhelatê Sûrîye sey endamtîya rêxistin kerdî îdîaname. Dozgerî seba Neşeye cezaya zîndanî waşt. 

 

Se bîbî?

 

Çarçeweya tehqîqato ke Serdozgerîya Komare ya Amedî dabî destpêkerdiş de 8ê Hezîrane de 20ê ci rojnameger pêro pîya 22 kesî ameybî destbendkerdiş û 16ê Hezîrane de Mudira Karê Nuşteyî ya JINNEWSî Safîye Alagaş, Hemserekê Komeleya Rojnamegeran ê Dîcle Firatî (DFG) Serdar Altan, Edîtorê Ajansê Mezopotamya (MA) Azîz Oruç, Mudirê Karê Nuşteyî yê Rojnameyê Xwebûnî Mehmet Ali Ertaş û rojnameger Zeynel Abîdîn Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remzîye Temel, Ramazan Gecîken, Lezgîn Akdenîz û Mehmet Şahînî bi îddiayê "endamtîya rêxistine" ameyî tepiştiş.

 

Do roniştiş 11ê Temmuze de bêro dîyîş

 

No 10 aşmî yo ke derheqê tehqîqatê rojnamegeran de tu averşîyayîşêk çinî bî. Rojanê verênan de îdîanameyê derheqê rojnamegeranê tepişteyan hetê Serdozgerîya Komare ya Amedî ra ame hadrekerdiş û hetê 4ine Mehkemaya Cezaya Girane ya Amedî ra ame qebulkerdiş. Do roniştişê 15ê ci tepişte yê 18 rojnamegeran 11ê Temmuze de saet 09.00î de bêro dîyîş. Derheqê Mudira Karê Nuşteyî ya JINNEWSî Safîye Alagaşe de hema hîn îdîaname nêameyo hadrekerdiş.