Zelal Tunç

 

WAN - Namzeda Partîya Çep a Keske ya Wanî Havîn Kiya ke emrê xo yê şenikîye de tedaya dewlete vera koçber bîya vera asîmîlasyon û tedaye de têkoşîn dana vat ke do bi Partîya Çep a Keske reyde ser bikewê.

 

Namzedê Partîya Çep a Keske ya Wanî ra yew zî Havîn Kiye ya 29 serrî ya. Havîne bi rîyê xo yê huyaye û sempatîkbîyayîşê xo bale ancena. Havîne kam a?

 

Qey bî namzed?

 

Bêrêne ma pîya Havîne bişinasnê.

 

Namzedê Partîya Çep a Keske ya Wanî ra yew zî Havîn Kiye qezaya Şax a Wanî de serra 1994î de ameya dinya. Havîne tedaya dewlete emre xo yê şenikîye de nas kena. 5 serrî ya xo de keyeyê aye koçber beno. 4 serrî ya aye de zî pîyê aye wefat keno. Dayîka aye Meclîsê Dayîkanê Aştîye de ca gêna. Nameyê dayîka aye Wasfîye ya. Dayîka aye tesîrêk gird Havîne ser de virazena. 

 

‘Karekterê dayîka mi tesîrêk gird mi ser de viraşt’

 

Havîne heta 17 serrî ya xo Xaçortî de cuyena. Havîne wina vana: “Profîlê taxe her kes zano.” Dima ra bar kenê şinê Sixkê. Havîne nika keyeyê xo reyde Sixkê de cuyena. Badê di erdlerzê girdî yê Wanî keye koçê Cizîrê Şirnexî keno. Havîne uca de seba ziwanê kurdkî xebetîyena. Unîversîteya Artuklu de beşê Edebîyata Ziwanê Kurdî wanena. Havîne wina qisey kena: “Wextê HADEPî de ma Cizîr de bî. Dayîka mi ma şirawitêne partî. Mi kurdkîya xo aver berd. Tesîrê dayîka mi serê mi de xeylê zêde yo.” 

 

Havîne serra 2012î de beşê Edebîyat û Ziwanê Kurdî yê unîversîteya Artuklu de ca bena û 2016î de mezun bena. Dima ra serra 2017î de dest bi Lîsansê Berz ê bi Tezê Beşê Ziwan û Kulturê Ziwanê ke Yenê Cuyayîş yê Tirkîya yê Unîversîteya Artukluye kena. Unîversîteya Anqara de zî wendekara edebîyat û ziwanê Farsî ya Fakulteya Tarîx û Cografyaya Ziwanî ya.

 

‘Ez o cinîyan bi cuya kolektîf reyde bîyarî têhet’

 

Havîne derheqê namzedîya xo de zî wina vat: “No yewin o ke partîya ke xîtabê mi kena ya. Ez wazena têkoşînê xo tîya rayra bera. Ez bêra weçînayîş, ez o seba cinîyê ciwanî bêrê îstihdamkerdiş bixebitî. Ez wazena cinîyan bi raşteyê kolektîf reyde bîyarî têhet. Seba vengê ciwanan bidî eşnawitiş, ez o têkoşîn bikerî. Kurdistan de betalî xeylê zêde ya. Ciwanî mecbûr manenê ke koçê teberê welatî bikerê. Seba krîzê ekonomî, ez zî metropolan de xebityaya. Seba nê wazena bibî vengê ciwanan.”

 

‘Rayanê ciwanan wazena’

 

Havîne wina qedêna: “Weçînayîş de 6 mîlyon ciwanî rayanê xo xebitnenê. Ez rayanê ciwanan wazena. Ez venga ciwanan kena ke verê xo bidê Partiya Çep a Keske. Ma heqdar ê. Ma do serbikewê.”