Gulîstan Dursun

 

RIHA - Rihaya ke hema rêça erdlerzî ci de asenê, cinîyî hemverê îqtîdarî de bi hêrs ê û vanê: "Ma wazenê êdî hîn çî sererast bibê. Ma kurd ê û Partîya Çep a Kesk temsîlkarîya ma kena. Ma do raya xo bidê Partiya Çep a Keske."

 

Demêk kilm weçînayîşê 14ê Gulane rê mend. Dimayê  lîsteyê namzedan eşkera bî, xebate bi hawayêke lezgînî ameye kerdiş. Riha de zî pêwa rêça erdlerzî û zextan xebatê weçînayîşî dewam kenê. Cinîyê Rihayî derheqê rewşa weçînayîşî û zehmetîyê ke vînenê de qisey kerdî.

 

‘Vaatî estê la îcraat çin o’

 

Hatice Kiliç: Mêrdeyê mi nêweş o. Tutêk min o astengdar esto û tena kênaya mi şuxulêna. Faturaya min a awe û ceyranî ame la ez nêeşkena bida. Her weçînayîşî de yenê vaatan danê labelê demo ke yeno  serê icraatî ma çîyêk hetê kesêk ra nêvînenê. Xizmet nêkenê. Ser de zî xirba erdlerzî zî anê nêzdîyê keyeyê ma de rijnenê. Tîya laser rawuşt, keyeyê waya mi binê awe de mend. Ma seba aye kîra ewnîyenê. Ma bi hîrê tutanê aye ber bi ber gêrenê. La ma keye nêvînenê. Ma erdlerz û rawuştişê laserî de tu hetkarîya dewlete nêdî."

  

‘AKPyî rê rayî çin ê’

 

Adul Demir: Mi verê raya xo dayîne AKPyî. Mêrdeyê mi zî dayîne HDPyî. Labelê ez o êdî raye nêdî AKPyî. Hetê ekonomî de êdî her çî zaf vay bîyo. Ma wazenê hîn çî sererast bibê. Ma kurd ê û Partîya Çep a Keske temsîlkarîya ma kena. Ma do raya xo bidê Partîya Çep a Keske. Dimayê erdlerzî zî ma wazenê edalet bêro."

 

Necla Tepe: Heta nika ma raya xo dayîne AKPyî labelê erdlerz virazîya, însanî vêşanî û têşanî ra dinyaya xo bedelnayî. Êdî ez o raya xo bida Partîya Çep a Keske. Na partîya ma ya. Encax aye wayîrê ma vejîya. Coka ma do raya xo bidê na partî.

 

‘Do welatijê Rihayî 14ê Gulane de paltdayîş bidê dayîka Emîne’

 

Sahra Dogan: Ez wazena seba weçînayîşî wayîrê hêvî bibî. Kam heq keno wa o qezenc bikero. Do îhtimalêk pîl serbikewo. Ez kurd a û ez o raya xo bida xo. Ez bawer kena dimayê weçînayîşî do hîn çî baş bibê. Do têkoşînê Emîne Şenyaşar zî serbikewo. Têkoşînê dayîka Emîne, cesaret da her kesî. Hêvî da. Do welatijê Rihayî 14ê Gulane de paştdayîş bidê dayîka Emîne.

 

Naile Kaplan: Ez bawer a ma do dest bidê yewbînan û nê weçînayîşî pîya qezenc bikerê. Ma do 14ê Gulane de înan serê sindoqan de bêhelm verdê. Ma do serbikewê.

 

‘Barê ma giran o’

 

Emine Yaşar: Şar bi serran o binê zilm û zextî de yo. No di serrî zêdeyêr o dayîka Emîne verê edlîye de ya. Ne edalet esto, ne zî huqûq. Coka ez şarê Rihayî ra rica kena wa raya xo bidê Partîya Çep a Keske. Ma hêvî kenê ke do dimayê weçînayîşî rewşe başêr bibo. Ma wazenê tepişteyê ke zindanan de yê û serekatî serbest bêro verqdayîş. Ma do Riha de tewr tay 7 parlamenteran vejê. Serekatî binê tecrîdî de yo dayîka Emîne tîya de ya. Coka barê ma zaf giran o.