Melek Avci

 

ANQARA - Avûkate Mîrîam Fîedîng ke heyetê ke ame serdayîşê Tirkîya de ca girewt wina vat: “Ganî Ewropa êdî bizano ke hukmatê Tirkîya nêbeno dost. CPT mecbûr o agahî bido ma pêrûne. Mumkin nîyo ke na agahî sey sir bêra nimitiş. Nîyetê Tirkîya çin a agahî bida ma. La lazimîyê ma esto ke ma zanayîş bigîrê.”

 

Rayberê PKKyî Abdullah Ocalan ke 24 serrî yo Îmraliyî de binê tecrîdê giran de yeno tepiştiş, 25ê Adara 2021ine ra heta nika Abdullah Ocalan, tepişteyê verê ey Veysî Aktaş, Omer Hayrî Konar û Hamîlî Yildirim ra tu agahî nîna girewtiş. Avûkatanê Abdullah Ocalanî tewr peyîn 7ê Tebaxa 2019ine de ey reyde pêvînayîş kerdibî û seba pêvînayîşan bikerê hem raşteyê mîyanneteweyî hem zî Tirkîya de bi hezaran muracatî ameyî kerdiş. Muracatê ke ameyî kerdiş bêcewab mendî û bi bahaneyê cezayê dîsîplînî ameyî astengkerdiş. Komîteya Vernîgirewtişê Îşkencî yê Ewropa (CPT) aşma êlule 2022ine de dîyar kerdibi ke şîyo serdayîşê Îmraliyî la pêwa pêro pers û israran eşkera nêkerd ke bi Abdullah Ocalan reyde pêvînayîş kerdo yan nê.

 

‘Rapor dayê merciyê tirk’

 

Raporê derheqê serdayîşî yê CPTyî de 110ine kombîyayîşê heyetê pêroyî yê mabêne 6-10ê Adare de ke Strasbourgî de pê ardî komîteyî qebûl kerdibi. CPTyî 32yîn Raporê Pêroyî yê 1ê Çele-31ê Kanûna 2022ine hewênayîne, weşan kerd. CPT rapor de dîyar keno ke serdayîşê seba Îmraliyî kerdê, la derheqê rewşa Rayberê PKKyî Abdullah Ocalan, tepişteyê bînî Omer Hayrî Konar, Veysî Aktaş û Hamîlî Yildirim de tu agahî rapor de ca nêgirewtê. Rapor de ame dîyarkerdiş ke seranserê serra 2022yîne de CPTyî welatê endamê Konseya Ewropayî de serdayîşê perîyodik pê ardê û bi pêroyî 16 serdayîşî (140 rojî) pê ardê.

 

Avûkate Mîrîam Frîedîng ke heyetê Ewropayî aşma Sibate de ameye Tirkîya de ca girewte derheqê serdayîşê xo û CPTyî de JINNEWSyî rê qisey kerd.

 

Mîrîame dîyar kerd ke delegasyonê tecrîdî de ca girewta û şîya Amed û wina vat: “Ma şîyî Amed û ma bi komê cîya yê merdimê tepişteyan û dezgehê seba Îmraliyî reyde pêvînayîşan kerd. Ma bi komê cinîyan û femînîste reyde pêvînayîş viraşt. Ma avûkatan reyde pêvînayîş viraşt. Ma bi dayîkan reyde pêvîayîş viraşt. Merdim bi raştî zî zaf cîya bî la eynî waştişî waştêne. Tedaya serê şarê Amedî zaf zêde bî. Ma zîyaretî de fehm kerd ke Abdullah Ocalan qey yeno tecrîdkerdiş û seba komelî qey muhîm o. şertê zîndanan zaf xirab ê. Ma zîyaretanê xo de hemverê xeylê çîyan de şaş mendî”

 

‘Ma raştîya tecrîdî nizdî ra dî’

 

Mîrîame da zanayîş ke caardişê Îmraliyî û heme zîndanan verê zî zanayêne û nê çîyan ard ziwan: “Ma na raştî dî ke tecrîd tena Îmraliyî de çin o. Heme tepişteyî yenê îzolekerdiş. No tena Îmraliyî de çin o. Pêro zîndanan de esto. No di serrî yo ke Birêz Ocalanî ra xebere nîna girewtiş. Tu pêvînayîşêk nîno kerdiş. Qey şik çin o ke ma vanê Birêz Ocalan cuyeno la tu xeberêk nîna girewtiş.”

 

‘Ganî Ewropa çîyê ferz bikera’

 

Mîrîame vat ke Îmrali bi pêroyî ameyo îzolekerdiş û domna: “Xeylê avûkatî seba pêvînayîşî muracat kenê. Muracatê her tewir rayîr û metodî kenê. Merdim her çîyî keno. La CPTyî raporê xo eşkera nêkeno. Rapor çin o. Nê çîyî ra xirabêr tu çîyêk çin o. Ganî Tirkîya destur bida ke raporê CPTyî bêro weşanayîş. No Ewropa de zî bîyo problemêk gird. Ganî Ewropa çîyê ferzan bikera. La tu çîyêk nîno kerdiş. Ganî CPTyî na babete de tawîz nêdo Tirkîya. Ewropa seba menfîetan bi Tirkîya reyde têkilî aver bena. La ganî êdî fehm bikera ke hukmatê tirke reyde nêeşkenê bibê dost. Ganî fehm bikerê.”

 

‘CTP ganî xebere bido ma’

 

Mîrîame qiseykerdişê xo yê peyênan de zî dîyar kerd ke Tirkîya nêwaza zî ganî CPTyî rapor eşkera bikero û wina peynî ard: “Ganî hukmatê tirke raporê CPTyî qebul bikero û fehm bikero. Ma sey welatê mîyannetemewî vînenê ke Tirkîya se kena. Ma nê çîyî qebul nêkenê. Ma do hewldayîşanê xo dewam bikerê. Ganî CPTyî derheqê Îmraliyî de bi lez xebere bido.”