MERKEZÊ XEBERAN - Muxabîra ma ya tepişteye Habîbe Erene, dîyar kerd ke Zîndanê Cinîyan ê Sîncanî de înfazê 14 tepişteyan ameyo veşênayîş û binpaykerdişê heqan ê hemverê Verfeka Demî ya TJAyî Ayşe Gokkan ke pê reyde sewqê eynî zîndanî ameya kerdiş, nuşt.

 

Muxabîra ma Habîbe Erena ke pêwa 15 meslegdarê xo 29ê Teşrîna Verêne de amegî tepiştiş, rojnameyê Yenî Yaşamî reyde mektube şirawit. Habîbe mektuba xo de binpaykerdişê heqan ê hemverê Verfeka Demî ya Tevgerê Cinîyanê Azadan (TJA) qal kerd. Sewbîna Habîbe binpaykerdişê heqan ê hemverê înan de ameyê kerdiş zî mektuba xo de neql kerd.

 

Mektuba Habîbeyeye kuncikê bi nameyê "Îçerîden (Zerre ra) ame weşanayîş wina yo. “Seke şima zî zanê Verfeka Demî ya TJAyî Ayşe Gokkan Zîndanê Padayeyê Cinîyan ê Amedî ra sirgûnê tîya ameye kerdiş. Ma eynî qawîşî de yê. Ayşe Gokkana ke hetê zîndanî ra 1ê Adara 2023ine de ameya surgunkerdiş, nêweşa tansîyona berzî ya. Demo ke rayîr ra aye ardê, tansîyona aye berz bîya û vejîya 19ine. Pêwa tersê ke eşkayîne gonî bikewtêne serê mezgî zî, vera ke tu tedbîran bigîrê û bêkontrolkerdişê weşîye, destê aye bi hucreyêk qijî yê rîngî de kelepçe kerdê û bi no hewa vejîyayê rayîr. Dimayê ke Ayşe rayîr de nêweş kewena aye wedarnenê nêweşxaneyê Meletî la seba erdlerzo ke beno, bi lez û bez uca ra zî benê. Demo ke yenê nêzdîyê Qeyserî, tansîyonê aye zereyê rîngî de pêmawenê û yeno vînayîş ke tansîyonê aye berz a. Tewr peyîn gonî zince aye ra yena. Pêwa ke doktorî vanê, 'Eke gonî zince ci ra bêro o tehluke yo’ reyna raywanî dewam kena. 

 

Gerre kerd

 

Badê cu, aye seba demêk kilm benê nêweşxaneyêk serê rayîrî û hebêke danê. Na raywanî 18 saetan dewam kerda. Ayşe Gokkane derheqê îdarekarîya zîndanî, midûr û leşkerê ke emnîyetî sewqîyatê ra berpirsyar ê de gerre kerda. Mi waşt bi rayîrê şima na babete bîyarî rojeva rayaumumî.

 

Binêaykerdişê heqan 

 

Tîya de werdê vejeteryanan zî nîno dayîş. Aşmêke nêvetê sohbet. Tena reyke vetê spor. Vatî qedexeyê aye yê pêvînayîşî esto, destûr nêame dayîş ke bi parlamentere Fatma Kurtulan reyde pêvînayîş bikera. Faksê bi kurdkî yê ke Zîndanê Bûnyanî reyde şirawitibi dimayê serrêke wayîrê ci rê ame dayîş. Pêwa qerarê Dadgeha Destûrê Bingehîn zî, seba fotokopîyê muracatê fermî yê zîndanî pere yeno waştiş. Kovarê ke verê şirawitî zîndan, êdî nêdanê ma.

 

Înfazê 14 tepişteyan şirawitî

 

Tîya bi pêroyî înfazê 14 tepişteyan veşênayî. Tepişteyê ke înafzê înan ameyê veşênayîş, nameyê înan wina yo: Nedîme Yaklav, Sermîn Demirdag, Mukaddes Kubilay, Zeynep Bîngol, Sedef Demir, Sabite Ekinci, Rojdan Erez, Dîlan Playas, Berrîn Sari, Jiyan Ateş, Hanim Yildirim, Ozlem Demir, Rozerîn Yildiz e...”