WAN - Wan de hemwelatîyî eleqeyêk gird mojnenê bernameyê Partîya Çep a Keske û dîyar kerdî ke do heme parlementerê cinîyî bişirawê meclîs û seba xebatan vengê seferberîye kerd.

 

Weçînayîşo ke do 14ê Gulane de pê bêro rê tay mend û Partîya Çep a Keske xebata xo ya weçînayîşî û akerdişê buroyanê weçînayîşî bêmaben dewam kena. Hemverê tedaya îqtîdarî de cinîyî xo hadre kenê ke 14ê Gulane de tarîx binusnê. 

 

Wan de 4 cinîyî

 

200î ra zêde namzede Partîya Çep a Keske cinî yê. Wan de 8 namzedî estê û rêza yewine de hemsereka pêroyî ya HDPyî Pervîn Buldane esta. Rêza 3ine hemşaredarê Artemîtî ke mazbataya aye ameye dayîş Gulcan Kaçmaz Sagyîgîte, rêza 5ine de Endama Meclîsê Partîya DBPyî Gulderen Varli û rêza 7ine de Havîn Kiye esta. Pêro pîya 4 namzedê cinîyî yê Wanî estê.

 

Vizêr bi tewrbîyayîşê Hemverfeka Partîya Çep a Keske Çîgdem Kiliçgun Uçare Raşteyê Cumhurîyetî de nizdîyê Beşyolî de buroyê weçînayîşî yê cinîyan ame akerdiş. Cinîyî eleqeyêk gird mojnayî akerdişê buroyî. 

 

‘Cinî serkêşîye kenê’

 

Şadîye Tamure da zanayîş ke yewine waştişê aye weçînayîş de serkewtiş o û vat ke serkewtiş do yê înan bibo. Şadîyeye sewbîna bale ant aştî, demokrasi û azadîye ser. 

 

‘Raya xo bidenê xo’

 

Cinîya bi nameye Safîye Tamure zî dîyar kerd ke ganî cinîyî hîna zêde tewrê xebata weçînayîşî bibê û wina dewam kerd: “Heta ke destê ma ra bêro ma do xebatan gird bikerê. Ma do raşte bi raşte bigêrê û xebate rayra berê. Vengê mi seba Kurdan o. Raya xo bidenê xo.”

 

‘Ma do 14ê Gulane de tedaye wedarnî’

 

Asîye Bartuye zî vat: “Ma wazenê ke partîya ma serkewtişêk gird dest bifîna. Ma do tesilî ser bikewê. Kurdan ser de tedayêka gird esta. Ma do 14ê Gulane de tedayan wedarnê. Wa cinîyî wirzî payan ser. Vengê xo berz bikerê.”

 

Gule Donmeze zî dîyar kerd ke do bi coşêk gird her çar namzedanê xo zî bişirawê meclîs.

 

‘Nêeşkenê Kurdan çinî bikerê’

 

Cinîya bi nameyê Perînaz Bîlene wina vat: “Ma do 8 namzedanê xo zî bişirawî meclîs. Ma ziwan û nasnameyê xo wazenê. Ma do pîya ser bikewê.”

 

Hamdîye Çîtçîye zî eşkera kerd ke xebata cinîyan ya Partîya Çep a Keske de ca gêna û vat ke hetê şarî ra bi eleqeyêk gird yenê pêşwazîkerdiş. 

 

Îrem Çevîkene dîyar kerd ke ganî heme kurdî vengê xo berz bikerê û qet esteyê bodrumê Cizîrî xo vîra nêkerê û raya xo nêdî AKPyî.

 

Hîlal Borake qiseykerdişê xo de vat: “Seba azadîya xo seba herra xo, tepişteyê xo û vera zilmî de raya xo bidêne Partîya Çep a Keske.

 

Hava Ataşe zî bale ant weçînayîşî ser û vat ke do heme namzede cinîyî bişirawî meclîs û do ser bikewê.