Rojda Aydin

 

MÊRDÎN - Cinîyê Qoserijî, ardî ziwan ke ê do weçînayîşî de hemverê qetilkerdişê cinîyan, şer, krîz û pêro probleman îqtîdarî bierşawê û vatî: "Ma do wayîrê îrade û sindoqanê xo bivejîyê.”

 

Weçînayîşê Pêroyî ke do 14ê Gulane de pê bêrê, tay rojî mendî. Seba nê xebatê Partîya Ameyoxê Çepe ya Keske (Partiya Çepe ya Keske) bêmabên kuçe,  taxe û bajaran de dewam kenê. Weçînayîşo ke seba temamê şaran xeylêk muhîm o, dîyar kenê ke ê do  îqtîdarê AKPyî bierşawê. Cinîyê qezaya Qoserê Mêrdînî zî derheqê weçînayîşî de ajansê ma rê qisey kerdî.

 

‘Ma do zorê faşîzmî berê’

 

Şerîfe Tanirga, dîyar kerd hêvîya înan o yo ke weçînayîşê pêroyî de serbikewê û îqtîdarê bîyaye bierşawê û vat: “Ganî nê weçînayîşî de ma sey şarê Kurdistanî qetî serbikewê. Ma wazenê no weçînayîş bibo wesîleya vindarnayîşê şerî, awanbîyayîşê azadî û aştî. Ma wazenê têduştî pê bêro û ma bi hawayêkê azad bieşkê bi ziwanê xo yê kurdkî her ca de qisey bikerê. Ma wazenê no îqtîdar şêro û weşîyêk û aramîyêke bêro nê welatî. Ma nêwazenê êdî teda û zilm serê cinîyan de bêro kerdiş. Seba nê zî eke no îqtîdar şêro, ma cinî do azad bibê. Ma bindestî û zilm tu wext qebûl nêkenê. Bi xususî wa pêro şarê ma wayîrê îrade û sindoqanê xo vejîyo. Helbet weçînayîşî de ma do rayanê xo bidê xo û zorê îqtîdarî berê. Hemverê zilm û zextan heta ke ma bibê, ma kurd ê. Ma do zorê faşîzmî berê.”

 

‘Ma do îqtîdar bierşawê’

 

Zîlan Ozeltapti zî dîyar kerd ke ê sey cinîyê ciwanî xeylêk bi hêz ê û vat, seba weçînayîşî tax bi taxe û keye bi keye gêrenê. Zîlane wina vat: “Ma tu wext nêvindenê. Heta ke ma ê nêyarê war ma nêvindenê. Ma sey cinî hemverê nê bêedaletî de sere nêtewêna û nêtewênenê. Ma her ware de sloganê jin, jiyan, azadî berz kenê. Ma sey cinîyê ciwanî îqtîdarê ke 22 serrî yo dişminîyê cinîyan keno û înan werte ra wedarnê, bibê yew veng. Ma taxe û kûçeyan de xebatanê xo bêmabên dewam kenê. Ma tîya yê û ma estê. Mêrdîn de 6 namzedê ma estê. Ma a vîr û bawerî de yê ke 6 namzedanê xo zî vejê. Venga mi şarê Mêrdîn û temamê o yo ke wayîrê rayan û sindoqanê xo vejîyê.”

 

‘Nê zilmî rê êdî bes o’

 

Ayşe Şahîne da zanayîş ke azadî û têduştî wazenê û wina ercnayîşê xo kerd: “Wa peynîya nê zilmî bêra. Şar heme krîzê ekonomîye vera feqîrîye mîyan de yo. Wa no weçînayîş asayîş bîyaro welat. Her ca de şer û kiştiş esto. Ma şer û kiştişî nêwazenê. Wa peynîya nê şerî bêra. Ma nêwazenê ganî birija. Êdî bes o, wa cinî nêrî qetilkerdiş.”

 

‘Ma do raya xo bidî xo’ 

 

Gulê Ertaşe dîyar kerd ke ganî êdî kesêk bi wijdan ser bikewo û vat: “Ez do raya xo bida xo. Ma wazenê kesêk baş û bi wijdan bêro sere. Welat de krîzêk gird esto. Ma wazenê ke no krîz raşte ra wedarîyo. No problem tena bi rayîrberîyêk baş eşkeno bêro çareserkerdiş. Kesê bêwijdan vera welat nika kewto çi rewşe ma vînenê. No îqtîdar wa êdî şêro.”

 

‘Ma do nê îqtîdarî bişirawê’

 

Sultan Kaymaze zî wina waştişê xo ard ziwan ser: “Ma zî êdî weşîye wazenê. Êdî bes o nê zilmî rê. Her roje welat de cinîyî yene qetilkerdiş. Zerrî û kesebaya ma dejena. Wa vernîya nê qetlîyaman bêro girewtiş. Ma wazenê ke no şer vindero. Ma hertim vera şerî de yî. Seba çareserkerdişê nê heme probleman ganî ma nê îqtîdarî bişirawê.”