WAN - Cinîyan dîyar kerd ke sebebê krîzê ekonomîye, sîyasî û komelkî yê welatî îqtîdar o û bi vatişê ‘Ma nanê huşk wenî’ û ‘Wa rayê xo nêdî faşîstan’ veng kerd.

 

Welat de krîzê ekonomi her ke şino giran beno û tesîrêk gird her hetî ser de keno. Mîyanê nê polîtîkayanê zêdeyan de Kurdistan û Tirkîya xo hadre kenê ke şêrî weçînayîş. Şar dîyar keno ke ganî îqtîdarê 22 serra bibedilîyo û paweyê weçînayîşê 14ê Gulane yî. Wan de cinîyan na babete ercnaye û dîyar kerd ke ekonomî bi bedilnayîşê îqtîdarî do raşt biba.

 

‘Sebebê vayebîyayîşan Tayyîp Erdogan o’

 

Alîye Koçake dîyar kerd ke semedo ke her çî vaye bîyo nêeşkenê îdareyê xo bikerî û vat: “Êdî ma aciz bîyî. Dolabê ma veng o û ez fikirîyena ke dolabê xo biroşa. Erdoganî vera vaye esta. Ma nanê huşk wenî. Vaye zêdîyenê. Dewlemend beno dewşemend û feqîr zî beno feqîr. Kîloyê goştî bîyo 300 TL. Ez roşan de çi bigêra? Tirkîya têk şîya. Tirkîya de çi mendo? Her çî ameyo rotiş. Hêvîdara ke badê weçînayîşî raştkerdişî bibî.”

 

Ma bibedilî!

 

Alîyeye da zanayîş ke îqtîdaro bîyaye dersek ke qet nêro vîrîkerdiş dayo şarî û wina dewam kerd: “Ez û waya xo pîya yew ca de cuyenî. Waya mi 5 hezar TL meaş gêna. Ma nêzanê bi nê pereyi se bikerî. Ma kîra bidî, nan bigêrî? başo ke domanê mi çinî yî. Eke bibayêne ê do zî rezîlî mîyan de bicuyayêne. Îqtîdar bibedilîyo do tay çîyî zî bibedilî. Ma wazenê bibedilîyo. Ma do bibedilnî.” 

 

‘Ez kam ca ra bîyara’

 

Saîme Ozere zî ard ziwan ke aşma Remezanî de kîloyêk goşt domananê xo rê nêgirewta û domna: “Çinî yo ez kam ca ra bîyara. Ma nêeşkenê kerg daxî bigêrî. Sebze vaye yo. Kes nêeşkeno domanê xo rê çîyêk bigêro. Merdim perîşan bîyo. Ganî Kurdî nê weçînayîşî qezenc bikerî.” 

 

‘Tirkîye têk şîya’ 

 

Turkan Sîncîye reaksîyon mojnaye û vat: “Tirkîya her ke şina vînî kena. Têk şîya. Heta ke ê serê ma de bibî tu çîyêk nêbedilîyeno. Ganî no îqtîdar bibedilîyo. No destê şarî de yo. Ganî ma bidedilî. Çi destê ma ra bêro ganî ma bikerî. Îqtîdar nêbedilîyo do hîna zêde ma xira bibî.”

 

Kar çinî yo, meaş çinî yo 

 

Gulnaz Orhane zî dîyar kerd ke kênaya aye nêweş kewta û mecbur menda ke heywananê xo biroşa û wina dewam kerd: “Verê cû îdare asan bî. Rewşa ma baş bî. Ma se bikerî ma se vajî? Ma nêeşkenê îdareyê xo bikerî. Kar çinî yo, her çî vaye yo. Domanê ma betal î. Kîloyê sebze 30-40 TL yo. Kar çinî yo. Kar bibayêne ez do bixebetîyayêne û mi do biewnîyayêne domananê xo.” 

 

Dayîş û girewtişê roşanî bi xeyal 

 

Welatîyêk ke nêwaşt nameyê xo bido vat, bi hîrê tutan debare zaf zehmet o û wina ard ziwan: “Ma hewl danê dayîş û girewtişê roşanê bikerê la ma senîn bikerê. Tu çîyêk nîno girewtiş. Ez nêeşkena tutanê xo rê cilan bigîrî. Nanêk bîyo 6 TL ma senîn bigîrê.”

 

‘Wa kurdî rayanê xo nêdê faşîstan’

 

Hulya Ugurlu bale ant serê zextê serê şarê kurdî û wina vat: “14ê Gulane de weçînayîş esto. Ganî şar her çî verê çiman de bigîro û rayanê xo nêdo faşîstan. Wa kurdî êdî rezil nêbê. Wa êdî rayanê xo nêdê faşistan. Sebebê pêro vayîyan Erdogan o. Aşma Remezanî de merdimî nêeşkenê çîyêk bigîrê. Nêeşkenê cilan bigîrê. Êdî bes o. Ma nê zulmî rê  xilas bibê.”

 

‘Kurdî yenê înkarkerdiş’

 

Melîke Ozkurt zî nê ercnayîşî kerd: “Kurdî her ca de rastê bêtêduştî yenê. Ma ziwanê xo qisey kenê, vanê şima çira qisey kenê. Kurdkî nîna qebûlkerdiş. La heta hetayî ez kurd a. Wa her kes destê xo bido serê wijdanê xo û şêro serê sindoqan.”