RIHA - Çalakîya "Nobeta Edaletî" ya keyeyê Şenyaşarî 752 rojî yo dewam kena. Çalakîya ewro de bale dîya serê muhîmîyê weçînayîşî.

 

Merdim û pawitoxê Parlamenterê AKPyî yê Rihayî Îbrahîm Halîl Yildizî 14ê Hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerdibî. Netîceyê hêrişî de mêrdeyê Emîne Şenyaşar û di lajê aye amebî qetilkerdiş. Nê ser de Emîne Şenyaşar û lajê aye Ferît Şenyaşar 9ê Adara 2021ine de vernîya Edliyeyê Rihayî de dest bi çalakîya Nobeta Edaletî kerdibî. Çalakîya keyeyê Şenyaşarî roja 752ine de dewam kena.

 

Çalakîya ewro de Ferît Şenyaşar qisey kerd û vat: "Ma pawe bî ke hukmat edalet ca bîyaro labelê ma dî kesê ke benê sebebê bêedaletî, Riha de sey namzed ameyî mojnayîş. Riha bajarê pêxemberan a. Demo ke Hz. Îbrahîm ame veşênayîş, qismêk şarî kolî arêdayîne û qismêk şarî zî adir tafînayîne. Nika weçînayîşêk vernîya ma de yo. Kesê ke bîyê sebebê bêedaletî Riha de sey namzed ameyî mojnayîş û do şarî ra raye biwazo. Şarê Riha do 14ê Gulene de bi wijdanî şêro serê sindoqan.”