Dîlan Babat

 

HATAY - Cinîyan dîyar kerdî ke wa îqtîdarî ra tu kesêk seba rayan nêro verê berê înan û vatî: “Êdî tîya ra seba îqtîdarî tu rayêk daxî nêvejîyena. 5 serrî bî, mi raya xo dayene AKPyî la êdî ez nêdana.”

 

Di erdlerzê ke merkezê înan Mereş bî ser o ra di aşme derbaz bî. Yew cayo ke erdlerzî ra zaf zirar dî Hatay bî. Hatay de hema zî problemê kone, gida û xeylê çîyanê bînan nêameyo çareserkerdiş. Her çend ke herême de problemê erdlerzî hema zî bîyayîşê xo bipawê zî nika weçînayîş zî rojeva înan de yo. Cinîyê ke qezaya Defne ya Hatayî de cuyenê dîyar kerdî ke wa îqtîdarî ra tu kesêk seba raye nêro verê berê înan.

 

‘Hema kesê ke kone înan çin ê estê’ 

 

Tulîn Şahîne da zanayîş ke serê erdlerzî ra di aşme derbaz bî û şar hema zî sey roja ewilî yo. Tulaye wina dewam kerd: “Xirbî hema erd de yê. Tutî nêşinê mekteb. Perwerde çin o. Ez nêeşkena sereyê tutanê xo bişuya. Bi desan keyeyî çinî bîyî. Di aşmî yo ke ne karêk ne zî werdêk esto. Heta nika seba ke ma bêrê serê xo tu çîyêk nêame kerdiş. Vatî do hetkarîya pere bidê mexduranê erdlerzî. La nêame kerdiş û dayîş. Şarî ra hetkarî yena. La heta ke kam ca. Di aşmî yo ke şar pey kone de yo. Her reya ke varan vareno kone firena, wêran bena.”

 

‘Tutan bi awa varanî şuyenê’

 

Tulîne dewamê qiseykerdişê xo de vat: “Televîzyonan de seke her çî êdî normal bîyo mojnenê. Hatay de tu çîyêk ne baş û ne zî raşt bîyo. Merdim terke mergî ame kerdiş. Tutê mi çend reyan nêweş kewtî. Awa lîşine ra nêweş kewtî. Ez bi awa varanî sereyê tutanê xo şuyena. Kince serê ma êdî helisîyayî.” 

 

‘Wa kes nêro verê berê ma’

 

Tulîne bale ant serê weçînayîşî û wina qedêna: “Wa kes nêro verê berê ma. Demo ke weçînayîş yeno her kes yeno verê berê ma. Ma roja başî de kesî nêwazenê. Yo muhîm rojê xirabî de verê ma de bibê. Ma kes nêdî. Yew kesêk nêame tîya. Wa hetê dewlete ra kes seba rayan nêro verê berê ma. Bi serran bi mi raya xo dayîne AKPyî, êdî nêdana. Ma îqtîdarê newe ra wazenê ke keyeyê ma yê ke do bi pere bidê ma, bêpere bidê ma.”

 

‘HDP çinbîne ma do vêşan mendêne’

 

Esra Aslan zî dîyar kerd ke bi di aşmî yo bi hewldayîşê xo cuya xo dewam kena û vat: “Ma tu hetkarî dewlete ra nêgirewt. Embazê ma yê HDPyî nêbîne, ma do vêşanî ra bimerdêne. Ma rewşêka zehmet de bî. Hetêk ra vêşanî û heto bîn ra zî nêbîyayîşê perwerdeyî. Tutê ma perwerdeyî ra bêpar mendî. Rewşa cinîyan zehmet a. Ma ewnîyenê tutan ra, kone pak kenê. Ma do bi embazanê xo yê HDPyî nê rojan derbaz bikerê. Eke bêrê verê berê mi zî ez o vajî, xêrcê HDPyî tu kes nêameyo verê ma.”