Sema Çaglak

 

ŞIRNEX - Cinîyê Şirnexî derheqê weşînayîşo ke do 14ê Gulane de pê bêro de qisey kerdî û dîyar kerdî ke ê bi sîyasetêk demokratîke azadîya Rayberê PKKyî Abdullah Ocalanî tesilî kenê.

 

Bi nizdîbîyayîşê weçînayîşê serekkomarî û parlementerî ke do 14ê Gulane de pê bêro, partîyê sîyasî lez dayî xebatanê xo. Partîya Demokratîke ya Şaran (HDP) ke dewaya aye ya qefilnayîşî dewam kena do bi Partîya Çep a Keske reyde dekewa weçînayîş. Partîya Çep a Keske ke namzede xo dîyar kerd, xeylê cayan de buroyê xo yê weçînayîşî akena.

Cinîyê Şirnexî derheqê weçînayîşê 14ê Gulane de ercnayîşanê xo ardî ziwan. 

 

‘Ma do nê îqtîdarî bişirawê’

 

Sultan Îrmeze dîyar kerd ke ê do ser bikewê û nê îqtîdarî bişirawê û wina dewam kerd: “Têkoşîn û hewldayîşê ma seba heqanê ma yo. Ma heqanê xo yê ziwanî wazenê. Cinîyan ser de zilmêk gird esto. Her roje cinîyî bi hawayêk şikin dinyaya xo bedilnenê. Hukmatê AKMHPyî bi serran o cinîyan ser de zilm rayra benê. Êdî cinî hemverê nê zilmê hukmatî de bêveng nêmanenê. Tena cinî nê, ciwan û heme kesê muxalîfî zî bêveng manenê. Heta ke no îqtîdar nêşêro ma do raşteyan de bê. Ma do ser bikewê û do cinî azad biba. Sewbîna wa tepişteyê zîndanan zî serbest bêrî verdayîş û şarê ma yê ke koçber bîyo wa agêrî welatê xo. Bi taybetî ganî cinî û ciwan roja weçînayîşî de wayîrê rayanê xo bivejîyê.”

 

‘Ganî destur nêdîyo ke hîle bêrê kerdiş’ 

 

Şadîye Sumbule zî ard ziwan ke ganî heme kurdî bibê yew û rayê xo bidê xo. Şadîyeye wina vat: “Ma do ser bikewê û binê nê zilmî ra bivejê. Eke ma ser nêkewê cuya ma zî asayî nêbena. Ma êdî zilm û zordestîye qebul nêkenê. Wa kurdî wayîrê rayê xo bivejê û wayîrê sindoqan bivejê. Ganî destur nêdîyo ke sindoqan de hîle bêro kerdiş.”

 

‘No weçînayîş peynîardişê zilmê Erdoganî yo’ 

 

Rahîme Atmişe dîyar kerd ke weçînayîşê peynî peynîardişê zilmê Erdoganî yo û dewam kerd: “No weçînayîş hêvî dano ma. Ganî weçînayîş ra dima tepişteyê ma zîndanan ra bivejê û no şer bêro peynîkerdiş. Hêvî û waştişê ma no yo ke wa aştî û seyyewbînanî bêro nê welatî. No weçînayîş wa bibo wesîleya aştîyêk daîmî.”

 

‘Azadîya serekê xo wazena’

 

Sarya Îdeme zî da zanayîş ke wa weçînayîş bibo wesîleya demokrasiye û vat: “Ma bi aştî û sîyasetêk demokratîke azadîya serekê xo wazenê. Wa heme kurdî bibî yew û tîfaqê xo virazê. Xebata Partîya Çep a Keske baş dewam kenê û ma ci ra bawer ê. Ma do ser bikewê.”

 

‘Ma azadîya herra xo wazenê’

 

Cinîyan ra tewr peynî Emîne Tatare qisey kerd û vat: “Êdî wa no şer vindero. Wa gonî nêra rijnayîş û zerrîya tu dayîkêke wa nêvêşa. Heme dejê zerrîya dayîkan yew o. Wa weşî û asayîş bêro nê welatî. Ma nêwazenê bindest bibê, wa ma nêrî tepiştiş û kiştiş. Ganî weşî û edalet bêro. Ma azadîya herra xo wazenê. Bi serran o kurdî zîndanan de yê û dewaya heqanê xo kenê. Partîya ma xebata xo baş rayra bena û ma ci ra bawer ê.”