Gulistan Dursun

 

RIHA - Emîne Şenyaşar ke bi 2 serrî yo zêdeyêr o verê edlîyeyî de Nobeda Edaletî gêna, reaksîyon vera namzedîya Wezîrê Edaletî Bekir Bozdag ke Riha de dabi ro û vat: “Do no îqtidar bivuryo û do no camêrd şêro.”

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê Hezîrane 2018ine de qezaya Pirsûsî ya Rihayî de hêrişê keyeyê Şenyaşarî kerdibî. netîceyê hêrişî de mêrdeyê Emîne Şenyaşar û di lajê aye amebî qetilkerdiş. Nê ser de Emîne Şenyaşar û lajê aye Ferît Şenyaşar 9ê Adara 2021ine de vernîya Edliyeyê Rihayî de dest bi çalakîya Nobeta Edaletî kerdibî. Çalakîya keyeyê Şenyaşarî roja 751ine de do dewam bikero. Emîne Şenyaşar ke bi 2 serran zêdeyêr o verê edlîyeyî de Nobeta Edaletî gêna, reaksîyon vera namzedîya Wezîrê Edaletî Bekir Bozdag ê Rihayî mojna û vat: "Do no îqtidar bivuryo û do no camêrd şêro."

 

Seba her kesî edalet 

 

Emîne seba her kesî edalet waşt û vat: "Zimistan û hamnanî de ma nêvanê germ û serd ma rê nê edlîyeyî de seba edaletî nişnenê ro. Erdogan zî dozger û dadger zî zano ke tu sûcê ma çin o. Lajê mi Fadil bi serran o hucreyê yewkesî de yeno tepiştiş. Êdî bes o, ma edalet seba lajê xo zî her kesî wazenê. Wa lajê mi vera bidê, ha yo roşan zî nêzdî beno, ma zî bi tornanê xo ey pêşwazî bikerê. Ez persena qey dîn û îmanê şima çin o. Şima bi rehetî tutanê ma kiştî.”

 

‘Ma heqdar ê’

 

Emîneye da zanayîş ke Bekir Bozdag bi çi rîyî Riha de beno namzed û wina vat: "Şarê tîya zano ke ma heqdar ê. Zano ke Wezîrê Edaletî, Îbrahim Halil Yildizî paweno. Pey zaliman de vindeno, o wext o zî sey înan zalim o. Ma nêwazenê bêro tîya, şar zî nêwazeno. Eke bêro vernîya şarî, do şar tûf bikero serê çimanê ci û vajo 'şore verê edlîyeyî. Ti do senîn cewab bidê înan.”

 

‘Do no sîstem bivuryo’

 

Emîneye derheqê namzedîya lajê xo Ferit Şenyaşarî yê Rihayî de vat: "Ez seba namzedîya lajê xo kêfweş bîya. Heta lajê mi zîndan ra vejîyo, ma do verê edliyeyî de bê. Wa lajê mi vera bidê, ez zî şêrî keyeyê xo. Merdimî vêşan ê. Zîndanî bi kesê bêsûc pirr bîyê. Ma hêvî kenê ke no sîstem bivuryo. Do no camêrd şêro.”