Rozerîn Gultekîn

 

STENBOL - Verfeka Cinîyan ya Partîya Çep a Keske ya Stenbolî Dîdem Goçere da zanayîş ke çarçeweya beyannameyê weçînayîşî yê cinîyan de hedefê înan yê yewine vindarnayîşê şîdetî yo û vat ke do vatişê cinîyan 14ê Gulane de her çîyî bibedilno û cinî do Partîya Çep a Keske tercîh bikerê.

 

Partîya Demokratîke ya Şaran (HDP) vera tehlukeyê girewtişî qerar daye ke do Partîya Çep a Keske reyde dekewa weçînayîşê donemê 28ine ke do 14ê Gulane de pê bêro. Meclîsê Cinîyan yê Partîya Çep a Keske 2yê Nîsane de beyannameyê Weçînayîşî yê cinîyan yê 2023yî deklere kerd.

 

Verfeka Cinîyan ya Rayîrberîya Partîya Çep a Keske ya Stenbolî Dîdem Goçere derheqê beyannameyî de û weçînayîşî de JINNEWSî rê qisey kerd.

 

Hetê şarî ra ame qebulkerdiş

 

Dîdeme da zanayîş ke beyannameyê weçînayîşî hetê şarî ra ame qebulkerdiş û hemverê akerdişê buroyan de eleqeyêk gird yeno mojnayîş. Dideme wina dewam kerd: “Tîfaqê Cumhur û Mîletî çîyêk nêdanê cinîyan. Na babete de Beyannameyê Weçînayîşî yê Partîya Çep a Keske cayêk zaf muhîm o. ma do hêzê xo 14ê Gulane de bimojnê. Nê weçînayîşî de do cinî derse înan bidê.” 

 

Hedef vindarnayîşê şîdetî yo 

 

Dîdeme bale ant serê nuqtaya ‘stargehê cinîyan’ ya ke beyannameyî de ca gêna ser û wina vat: “Şîdet nê welatî de birînêk gird o. Qet şik çin o ke hedefê ma yê yewine vindarnayîşê şîdetî yo. Vernîgirewtişê şîdetî yo. Her roje cinîyê ke şîdet vînenê estê. Cinîyê ke keyeyê xo ra şîdet vînenê estê. Coka ra heta ke çareserîyêk daîmî bêra vînayîş, ganî cinî şîdetî ra bêra xelisnayîş. Qet şik çin o ke çareserî nîyo la ganî cayê ke cinî tede bêrê pawitiş bibê. Ganî şaredarî xizmet bikera. Ganî wezîrîya cinîyan xezmet bida. Ganî cinî bêters bicuwîya. Coka ra stargehî muhîm ê. Cinî do cuya xo çarçeweya nesneyan de bi xo dîyar bikera. Beyannameyî de nuqtaya taybet ya ke ser de vindarîya na ya. Do her tim waştişê cinîyan aver de bê.”

 

'Do raşteyê berardişî bêrî awankerdiş’

 

Dîdeme wina vat: “Seba ke cinî travmayê ke cuyena xo sero ra bierza û cuyêka baş bêra awankerdiş ganî sere de butçe înan rê bêra cîyakerdiş. Ganî cinîyî xo asayîş de hîs bikerê. Ganî raşteyê ke bieşkê tede berardiş bikerê bêrê awankerdiş. Ganî derheqê nê çîyî de xebat bêra kerdiş. Lazimîya cinîyan çi ya ganî înan ser de xebat bêra kerdiş. Stenbol û her cayê welatî de xebat yenê rayraberdiş. Cinîyê koçber û yê bînî. Xoresnayîşê pêronan qet şik çin o ke mumkun nîyo. La ma do hewl bidê xo biresnê heme cinîyan. Tîfaqê Cumhurî, tîfaqê dişmenîya cinîyan o. Tîfaqê Milletî dişmenê cinîyan nêbo zî tu pêşnîyazêk înan yê seba cinîyan çin o. Coka ra zî do cinîyî rayê xo nêdê dişmenê cinîyan.”

 

‘Do vatişê cinîyan 14ê Gulane de bibedilno’

 

Dîdeme qiseykerdişê xo yê peyênan de wina vat: “Meclîsê Cinîyan yê Partîya Çep a Keske do xebata xo rayra biba. Ma do hewl bidê bi rêxistinê cinîyan reyde na babete de xebatan bikerê. Ma înan reyde rayîr şinê. Do vatişê cinîyan 14ê Gulane de bibedilno. Do cinî sindoqan de cewab bido AKP-MHPyî. Partîya ke tewr zêde hetê cinîyan ra yena tercîhkerdiş do Partîya Çep a Keske biba.”