Melek Avci

 

ANQARA - Namzeda Partîya Çep a Keske ra Ceylan Akçaye da zanayîş ke seba awankerdişê sibarojêke roşnî ê do sey partî têkoşîn bikerê û vat: “Ez û bi hezaran embazê sey mi seba ke semedê tarîtîya îqtîdarî bidê şikitiş ma yenê. Ma meclîs de vatişî xo bivajê.” 

 

Partîya Çep a Keske seba weçînayîşê parlementerî û serrekkomarî ke do 14ê Gulane de pê bêro, lîsteya xo eşkera kerd û 11ê Nîsane de zî do şinasnayîşê ci bêro kerdiş.

 

Namzedê cinî tewer zêde Partîya Çep a Keske de ca gênê. Lîsteya namzedan ya 34 bajarî ya Partîya Çep a Keske de cinî hûmara yewine de ca gênê. Ceylan Akçaye zî hûmara 8ine ya namzedan ya Amedî ya Partîya Çep a Keske de ca gêna. Ceylane derheqê têkoşînê cinîyan û cinîyê ke sey namzed ameyî mojnayîş do sibarojêke senî komelî rê awan bikerê ercnaye.

 

‘Partîya Çep a Keske pratîkê temsîlkarîya seyyewbînan vejena raşte’

 

Ceylane ard ziwan ke Partîya Çep a Keske sey partîyê bînî cinîyan sembolîk nêmojna û wina vat: “Ez Amedî ra ya û 8 serrî ya xo de tîya ra dûrî kewta. Ez 8 serrî ya xo de mecbur manda ke dewa xo ya ke tede pêrodayîş qewimîya ra koç bikera. Nika ez do herêma xo rê xizmet bikera, na rewşe mi kêfweş kena. Partîya Çep a Keske pratîkê temsîlkarîya seyyewbînan vejena raşte. Partîya Çep a Keske sey sembolîk cinîyan namzed nêmojna. Coka ra ez Partîya Çep a Keske ra bîya namzed.” 

 

'Cinîyê kurd nasnameyê xo vera yenê binpaykerdiş’

 

Ceylane da zanayîş ke cinîyê kurdî nasnameyê xo vera yenê binpaykerdiş û vat: “Wexto ke ma ewnîyenê muhakemeyo bîyaye merdim vîneno ke sîstemêke maskulen û patriarkal o û merdim cinî tede nêvîneno. Îqtîdaro bîyaye cinîyê ke sîyasetî de ca gênî ra aciz o. Tîfaqê Cumhurî destkewtişê cinîyan bi tîfaqê tepîyayan çinî keno. Îqtîdar Peymana Stenbolî ra ancîya, qanûnê 6284î zî munaqaşayî rê akeno. Nêrazîbîyayîşê xo yê hemverê cinîyan bi asanî mojneno.”

 

'Meclîs de ma do vatişê xo bivajê’

 

Ceylane dîyar kerd ke ê do meclîs de vatişê xo bivajê û vat: “Îqtîdaro 22 serran cinî tarîtîye de hepis kerd. Ma îqtîdarî rê vanê şima nêeşkenê cinîyan qurban bikerê. Ez û bi hezaran embazê sey mi seba ke semede tarîtîya îqtîdarî bidî şikitiş ma yenê. Ma meclîs de vatişî xo bivajê.”

 

'Ez seba her kesî sibarojêke baş wazena’

 

Ceylane vat ke Partîya Çep a Keske seba cinîyan sibarojêke baş aver bena û wina qiseykerdişê xo qedêna: “Kênaya mi ya 10 aşme esta. Ez seba aye sibarojêke baş wazena. Ez seba her kesî sibarojêke baş wazena. Ez veng dana kesê ke sibarojêke roşn wazenê. Seba her kesî la taybet seba cinîyan vana. Ez bawera ke do roşn biweçînê, tarîtî nê.”