ÎZMÎR - Rojnamegere Nazlican Yildize roniştişê ewilî yê dewaya ke  bi îddiayê "endamîya rêxistine" ci ra ameyîne muhakemekerdiş de bi şertê kontrolê edlî ameye tehlîyekerdiş.

 

Falîyetê Însiyatîfê Wendekaranê Azadan seba muxabîra ajansê ma Nazlican Yildize sey bahane ameyî mojnayîş û bi îddiayê "endamîya rêxistine" ameye muhakemekerdiş. Roniştişê ewilî yê dewa ke ci ra ameyîne muhakemekerdiş, 21ine  Dadgeha Cezaya Giran ya Bayrakli de ame vînayîş. Avûkat û keyeyê Nazlicane tewrê roniştişî bî. Sewbîna Şubeyê ÎHDyî yê Îzmîrî, HDP û rojnamegerî zî tewr bî.

 

Roniştiş bi tespîtê nasnameyî dest pêkerd. Nazlicane dîyar kerd ke çalakîyê xo çarçewaya aştîyane de pê ardê û waştişê tehlîyeyê xo kerd.

 

Dima ra îfadeyê şahidê nimite 900 ame girewtiş. Şahidê nimite dîyar kerd ke nameyê Nazlicane seke Rojîne yeno zanayîş û vat, bi talîmatê rêxistine mîyanê însiyatîfî de ca gêna. Dozgerî dewamîyê tepiştişê Nazlicane waşt.

 

Avûkatê Nazlicane Serhat Işikî zî da zanayîş ke îfadeyê şahidê nimite somut nîyê û waştişê tehlîye kerdî. Sewbîna avûkate Aryen Turan zî da zanayîş ke çalakîyê însiyatîfî nêeşkeno sey sûc bêro qebûlkerdiş. 

 

Dimayê mabêne heyetê dadgehe bi şerdê kontrolê edlî Nazlicane tehlîye kerd.