MERKEZÊ XEBERAN - Rojnamegere, nuştoxe û rexnegire Evrîm Alataş, 34 serrîya xo de dinyaya xo bedelnaye û bi xeber, kitab û têkoşînê xo her wext hemverê polîtîkayê tedayî yê dewlete reaksîyonê xo ard ziwan.

 

Nuştoxe, rexnegire û rojnamegere Evrîm Alataş ke temamê cuye xo de hewl da problemê şarê kurdî neql bikera, pêro cuye xo de fek têkoşîn ra vera nêda û her dem hemverê polîtîkayê tedayî yê dewlete reaksîyonê xo mojna.

 

Evrîme 15ê nîsana 1976ine de dewa Golpınar ê qezaya Akçadagê Meletî de dayîke ra bîye. Mektebê sereyîn û mîyanên dewa xo de qedêna û dima ra Stenbol de wendişê xo dewam kerd. Evrîma ke xo sey "kurd, cinî, elewî" bi name kerdêne, keyeyêk ke wayîrê nasnameya elewî-kurdî û wayîrê meylê çepgirî de pîl bîye. Yewgirewtişêk ke yew lazimîyê merdimbîyayîşî yo, açarna metodêk cuye. Wexto ke emrê aye qij bî vîna û fam kerd ke welat de cîyayîyê serê welatijê elewîyan de yeno kerdiş.

 

Evrîme, keyeyêk ke wayîrê vindertişê sîyasî de pîl bîye. Şîrînevlerê Stenbolî ke destpêk de uca de bi ca bî, atolyeyêk cilê kotî de di aşmî xebit ya la dimayê ke ser nêkewte, fek karî ra vera da. Evrîme, a mabêne de de dest bi wendişê xo yê amedeyî kerd, hişmendiyê xo yê nasnameyê kurdî, bi tesîrê derûdorî ke ci de ciwîyena, tewr xurt kerd. Nê prosesî de hedîseyê kiştişê kerdoxê nêdîyar û vengkerdişê dewan de, “waroşê kesê bînî” yê bajaran awan bî reyde, bi ciwanê o proseso ke wayîrê helwestêk sîyasî bî reyde, cigêrayîşêk cîya awan kerd. Evrîme na nuqta de têkoşînê sosyalîst nas kerd. Evrîma ke bi waya xo ya pîle reyde beşdarê eşkerayîya çapemenîye ya cinîyê kurd û tirkan ê Raşteyê Sultanahmetî yê derheqê qetlîamê Şirnexî yê serra 1992ine ame ciwîyayîş bî û ameye destbendkerdiş.

 

Evrîme, serra 1995ine de Kovara Newroze ya ke hetê birayê aye ra ameyîne vetiş, dest bi rojnamegerî kerd. Dimayê padayîşê kovare, rojnameyê ke serê rêça Rojnameyê Ozgur Gundemî vejîyayî, hewl da rastîyê ke nînê mojnayîş, ramojno. Rojnameyê Yenî Polîtîka, Demokrasî, Ozgur Bakiş û Ulkede Ozgur Gundem de muxabîrî û edîtorî kerd. 

 

Evrîma ke demê rojnamegerî kerdêne xeylêk reyan ameye destbendkerdiş, quncekê rojnameyî yê bi nameyê "Fîncan Xanim" de rewşa bîyaye bi hawayêk qomîk nuştêne. Evrîme xêrcê qunciknuştişî, derheqê binpaykerdişê heqan de zî xeylêk xeberî nuştê.

 

Evrîma ke rojnameyê sey Yenî Polîtîka, Demokrasî, Ozgur Bakiş, Ulkede Ozgur Gundem şuxulyaya, seba rojnameyê sey Evrensel, BîrGun, Ozgur Polîtîka, Radîkal Îkî û kovarê sey Esmer, Bîrîkîm, Amargî û Tîroj zî xeylêk meqale nuştê. Sewbîna Evrîme Rojnameyê Tarafî de zî quncikê bi nameyê "Kurtlar Vadîsî" de nuşta. 

 

Romanê yewin ê Evrîme "Hîkayeyê Mayoz Bounme" 2003ine de Weşanxaneyê Aramî de ame weşanayîş. Kitabê aye yê diyîn ke peyîno zî "Versîya Her Koyî Kewena Derya (Her Dagin Golgesî Denîze Duşer)" 2009ine de hetê Wêşanxaneyê Îletîşîmî ra ame weşanayîş.

 

Sewbîna bi rejîsorê sînemayî Miraz Bezar reyde serê Amedî hîkayeyêk babeta dinyaya kurdan û tutê mexdûrê şerî hewênayîne nuşt. Fîlmê metraj derg ê bi nameyê "Min Dît" wisarê 2009ine de Amed de ame antiş. Fîlmo ke beşdarê 46ine Festîvala Fîlman ê Porteqalê Zerdîn bi, Xelata Hîkayeya Tewr Baş ê Behlûl Dal girewt.

 

Evrîme demêk ke binpaykerdişê heqan xeylêk zêde bî, kesî bi destûrê dewlete ameyîne vînîkerdiş û rojnamegerî her ke şîne zahmet bîne de bi nêweşîya kanserî kewena. La Evrîme nê prosesê dermankerdişî zî bi nuştiş derbaz kena. Evrîme 12ê Nîsana 2010ine de seba nêweşîya kanserî ke demêk derg ci reyde têkoşîn kerdêne, keyeyê xo yê Amedî de 34 serrîya xo de dinyaya xo bedelnaye.

 

Cenazeya Evrîme serê wesîyetê aye Golpinara dewa ke ci ra dayîk bîya de ameye definkerdiş.