ANQARA - Seba wesîleya 90ine aşma qirkerdişê Gara Anqarayî merasîmê yadkerdişî ame organîzekerdiş û wina ame vetiş: “No îqtîdar bivuryo zî nêvuryo zî ma do fek waştişê xo yê edaletî ra vera nêdanê. Heta ke faîlî nêrê muhakemekerdiş zî do têkoşînê ma dewam bikero.” 

 

Netîceyê hêrişê bombayî yê DAIŞî yê 10ê teşrîna verêne de Garê Anqarayî de 104 kesî dinyaya xo bedelnabî. Seba wesîleya 90ine aşma qirkerdişî de merasîmê yadkerdişî ame organîzekerdiş. Komeleya Aştîye ya 10ê Teşrîna Verêne (10 Ekîm-Der) vernîya Garê Anqarayî de eşkerayîye da. Eşkerayîye de pankartê ke fotografê qurbanî ser de bî ame akerdiş. Beşdaran sloganê “10ê Teşrîna Verêne xo vîr ra nêkero û nêdo xovîrrakerdiş” berz kerdî. Merasîmê yadkerdişê bi deqeyêk rêzgirewtişî dest pêkerd. 

  

Sereka 10 Ekîm-Derî Mehtap Sakîncî Coşgun eşkerayîye de qisey kerd û vat: “Serê qirkerdişî ra 90 aşmî derbaz bî la hema zî teqîbatêk ke faîlî yenê muhakemekerdiş, nêameyo kerdiş. Ma her aşme protestoyê xo kenê. Ma nika ancî erefeyê weçînayîşêk de yê. Ma merdimanê xo mabêne di weçînayîşan de vînî kerdî. Ma zaf baş zanê ke kesê vatî; ‘eke ez çîyê mabêne her di weçînayîşan de qewimyayî qisey bikerî do kerra serê kerra de nêmano’ prosesê nê weçînayîşî de zî rol kay kenê. La no 90 aşmî yo tu berpirsyar nêameyo muhakemekerdiş. Wa nika tu kes sozê veng nêdo ma. Ma paweyê rojê ke sozê yenê bicaardişî yê.” 

 

Mehtape, qiseykerdişê xo wina qedêna: “Heta ke 10ê Teşrîna Verêne nêro roşnkerdiş, asayîşê ganê tu kesî çin o û do edalet nêro Tirkîya. Nê sîstemî ma zaf çinhesibnayîş. Bombayêkê raşteyê Anqarayî ame teqênayîş çin hesibnayî. Bi 90 aşmî yo hema wisar nêameyo. Ma bi xeyalê roja ke heme berpirsyar ê qirkerdişî yenê muhakemekerdiş, ciwîyenê. Seba merdimayî, ganî Tirkîya bi nê qirkerdişan reyde rî bi rî bo. No welat seba ma deyndar o. Kesêk ma rê do waştişê edaletî ra bêzar nêbo û ma do têkoşînê xo dewam bikerê. Îqtîdar bivuro zî nêvuryo zî ma do fek waştişê xo yê edaletî ra vera nêdê û heta kiştoxî yenê muhakemekerdiş zî do xo ver bidê.”