Sema Çaglak

 

ŞIRNEX - Hemverfeka Partîya Çep a Keske ya Cizîrî Firdevs Poyraze da zanayîş ke ê xebata xo bi serkêşîya cinî û ciwanan kenê û wina vat: “Ganî şar rayîrê rayanê xo û sindoqan bivejîyo. Bi Partîya Çep a Keske do xeylê çîyî bibedilîyê.”

 

14ê Gulane de do Tirkîya de weçînayîşê Serekkomarî û Pêroyî pê bêro. Partîya Demokratîke ya Şaran (HDP) dewaya girewtişî de derheqê aye de ameya akerdiş vera do bi Partîya Çep a Keske reyde dekewa weçînayîşî. Weçînayîşî rê demêk kilm mend û coka ra zî rojeva yewine ya şarî weçînayîş o. hemverfeka Partîya Çep a Keske ya Cizîrî Firdevs Poyraze derheqê prosesî de qisey kerd.

 

‘Ganî şar wayîrê partîya xo bivejîyo’ 

Firdevse dîyar kerd ke Partîya Çep a Keske awanbîyayîşê xo ra nata sîyasetê xo goreyê şertê HDPyî rayra bena. Fîrdevse wina vat: “Şar senî ke heta nika wayîrê HDPyî vejîya, bi eynî nizdîbîyayîşî do wayîrê Partîya Çep a Keske zî bivejîyo. Şarê Kurd êdî hişyar bîyo û ferqê muhîmîya weçînayîşo ke do demêk kilm de bêro kerdiş de yo. Her rayêk wayîrê ercî yo. Şar nê welatî de xeylê zor û zehmetîyan dî. Coka ra zî seba ke nê îqtîdarî û dîkatatorîye rê vajo bes do sindoqan ser de cewabê xo bido. Ganî şar wayîrê ray, sindoq û partîya xo bivejîyo.”

 

‘Êdî zilmî rê bes o’

 

Firdevse da zanayîş ke şar nê weçînayîşî ra hêvî yo û wina dewam kerd: “Tirkîya de pêkewtiş û krîzêk gird esto û coka ra zî tewr zêde kurdî tesîr benê. Şar muhîmîye dano nê weçînayîşî û bi xususî zî Partîya Çep a Keske ra hêvî yo. Coka ra şar rayê xo dano Partîya Çep a Keske û nê zilmî rê vano êdî bes o.” 

 

‘Cinî û ciwanî xebatan rê rayberî kenê’

 

Firdevse dîyar kerd ke xebatê înan bêmabên dewam kenê û dîyar kerd ke ê Botanî ra bi hêvî yê. Firdevse wina qiseykerdişê xo dewam kerd: “Ciwanî xeylêk bi kêlecan û bi coş ê. Seba Partîya Çep a Keske wayîrvejîyayîşêk pîl esto û mesajê muhîm danê. Bi xususî zî Newroze de Partîya Kesk a Çepe rengê xo mojna. Sewbîna şarê ma zî wareyê Newroze de vindertişê xo nîşan dayî. Xebatanê ma de cinî û ciwanî rayberî kenê. Ma bûroyê xo yê weçînayîşî xeylêk merkezan akerdî. Sewbîna ma Anqara de zî meclîsê xo yê cinîyan awan kerd. Nika zî ma bi xususî buroyê weçînayîşî yê cinîyan akenê.”

 

‘Ma hetê aştî û azadîye yê’

 

Firdevse, dîyar kerd ke Partîya Çep a Keske xêrcê pawitişê heqê şarê kurdî pawitişê heqê pêro şaran kena û wina vat: “Amancê ma yê yewin zorberdişê nê dîktarorî yo. Ma hetê aştî û azadîye yê. Kam destê xo dergê aştîye bikero, ma paştdayîş danê înan. Sewbîna hetê edalet û huqûqî de zî têkoşînê ma dewam keno. Seba ke nê welatî de bêhuqûqîyêk xeylêk pîl esto û şar edalet wazeno. Ma zî lazimî seba edaletî zanê û ma do xebatê xo no ware de bikerê. No weçînayîş do bibo peynîya nê îqtîdarî.”

 

‘Do xeylêk çî bivuryê’

 

Firdevse, wina qedêna: “Bi nê weçînayîşî reyde beno ke xeylêk çî bivuryê. Dimayê ke eke no dîktatorî vinî bikero, do şar boyêk bigîro. Vengdayîşê ma oyo ke şarê ma rayanê xo rê wayîr vejîyo. Bi Partîya Çep a Keske reyde xeylêk çî bivuryê.”