Dîlan Babat

 

HATAY - Gulhanim Yilmaza ke Samandagî de 35 serrî yo sebze ronena, nika mîyanê awanîya xisar dîyaye de karê xo domnena. Gulhanima ke kênaya aye û torinê aye erdlerzî de dinyaya xo bedilnayî, nika çîyo ke tena aye kêfweş keno seraya aye ya.

 

Di erdlerzê ke merkezê înan Mereş bî sero ra di aşmî derbaz bî û hema hemwelatijî bi paştîdayîşê şarî payan ser de yê. selahîyetdarî bi xebatanê sembolîkan îdîa kenê ke mexdurîyetê hemwelatijan raşte ra ameyo wedaritiş. Bajarê ke erdlerzî ra tesîr girewtî vera pêro zehmetîyan cuya xo domnenê. Qezaya Samandagî ya Hatayî de cinîya bi nameyê Gulhanim Yilmaza ke 35 serrî yo seraye de sebze ronena. Gulhanime dejo ke cuyaya bi seraya xo hewl dana ke vîrî bikera.

 

‘Qezencê ma çin o’ 

 

Gulhanime vat ke sebzeyan aye bi xo çinena û heme şitilê sebzeyî aîdê aye yê. Gulhanime wina dewam kerd: “Ma bezreyê emserrî 15ê Teşrîna Peyêne ra dima eşte erdî. Ma îdareyê xo tîya ra kenê. Krîzê ekonomîye vera û erdlerzî vera qezencê ma çin o. Erdlerzî vera ma vayeyan de raştkerdişêk nêviraşt. La her çî vaye yo. Zibil vaye yo. Zibil serra verene 3 hezar bî la emserr 7 hezar o. koyê naylonî 6 TL bî la emserr 7 TL yo. Ma derman bi 500 TL yan herînenê. Her çî vaye yo.”

 

'Hewl danê sebzeyan biresnê’

 

Gulhanime da zanayîş ke merdim erdlerzî vera kare xo vînî kerd û koçê bajaranê bînan kerd û wina vat: “Seba ke ma koç nêkerê, bi zor û zehmetîyan ma hewl danê sebzeyanê xo biresnê. Ma şêrê kam ca zî no karê ma yo. Eke çîyêk do bibo beno la çîyêk bêro kerdiş zî çin o. Ma ra balcan, firingî, xiyarî ameyê waştiş. La badê erdlerzî baxçe nêmend. Badê erdlerzî mi vat ez karê xo bikera. No kar mi payan ser de verdeno. Lajêk mi Stenbol de waneno. Banê hirê kênayê mi rijîyayî. Ma nika heme pîya seraye de manenê.”

 

Di aşme yo seraye de manenê

 

Gulhanima ke kênaya xo û di torinê xo erdlerzî de vînî kerd qiseykerdişê xo wina qedênaye: “Hema zî hetkarî seba ma nêameya kerdiş. Awanîyê ma yê ke xisar dîyî sey ‘bê xisar’ derbazê qeydan kerdî. Qeydan de seba ke wesayîtê ma esto hetkarî nêdanê ma. Sidika, Zehra û Nîsa dinyaya xo bedilnayî. Heta nika ma tu hetkarîyêka bi fêde nêgirewt. Birinc û run anê. Lazimîya ma bi nê çîyan çin a. Ma şewe nêrakewenê heta serê sibayî. Kesêk ma rê serweşîye nêwaşt. Bi aşman o awe çin a. Ma muracat kenê la vanê ke çin o. Ez meqerna nêwazena. No di aşmî yo ke ma seraye de manenê.”