Sema Çaglak

 

ŞIRNEX - Cinîyê Botanî dayî zanayîş ke weçînayîşî de Partîya Çep a Keske do 100 parlementeran bivejna û vat: “Ma nê weçînayîşî de eke wayîrê rayanê xo bivejîyê, ma do peynîya nê zilmî bîyarê û ma do ser bikewê.”

 

Weçînayîşo ke do 14ê Gulane de pê bêro û ameyoxê komelî do dîyar bikero rê nizdîyê yew aşme û nîme mend. Partîyê sîyasî û tîfaqî lez dayî xebatanê weçînayîşî. Sere de beşo ke do netîceyê weçînayîşî dîyar bikero cinî ya û cinîyan dîyar kerd ke ê nîmeyê şarî ra pê yenê. Kurdistan û Tirkîya de cinî zend û bendanê xo tadayî û dest bi xebatan kerdî. Bajaran de buroyê cinîyan ameyî akerdiş û taxan de zî cinîyî xebata xoser dayî destpêkerdiş.

 

Botan de zî xebata weçînayîşî ya cinîyan bêmaben dewam kena. Cinîyê Botanî derheqê weçînayîş û waştişanê xo de ajansê ma rê qisey kerdî.

 

‘Heme çî deste cinîyan de yo’

 

Rahîme Sîdare dîyar kerd ke serkewtiş bi yewîya kurdan mumkun o û vat: “Ma serkewtişî Partîya Çep a Keske ra wazenê. Serkewtiş yê ma yo. Ez silamanê xo pêroyê tepişteyan rê şirawena. Bes nê zilmî rê. Hêvîya ma no yo ke bere zîndanan bêrî akerdiş û no zilmê serê kurdan peynî bibo. Wa cinî û kurdî heme bibê yew. Eke ma nêbê yew ma do şêrê yew bi yew. Heme çî destê cinîyan de yo. Eke cinî xo aver biba û xo rêxistin bikera do komel û cuye zî aver bikewê.” 

 

‘Ma şer nêwazenê’ 

 

Xanim Aksuye zî vat ke ma wazanê şer peynî bibo û wina dewam kerd: “Çimê heme kurdan serkewtişî pey de yo. Bi nizdîbîyayîşê weçînayîşî reyde prosesêk giran vernîya ma de yo. Hem şer esto, hem zilmê serê kurdan esto. Ma do weçînayîşî de wayîrê rayanê xo bivejê û ma do peynîya nê zilmî bîyarê.” 

 

‘Wa bîyayîşê ma nas bikerê’

 

Besna Temîz zî qiseykerdişê xo de wina vat: "HDP heqê kurdan wazeno. Ma kurdî seba heqê xo têkoşîn kenê. Weçînayîş de ma aştîye û demokrasî wazenê. No hukmato bîyaye vano kurdî çin ê û kurdan wazenê biqedênê. Ma qîrenê ke ma kurd ê û ziwanê ma kurdî yo. Wa bîyayîşê na nas bikerê. Wa bivînê ke  partîya ma 100 parlementer veja. Kurdî pey dewa û heqê xo yê û do ser bikewê.”

 

‘Tepişteyanê sîyasîyan rê azadî’

 

Necîbe Temel, dîyar kerd ke hêvîya înan xeylêk pîl a û wina vat: “Hêvîya ma gird a. Şarê kurdî xeylêk dej û zilm anto. Weçînayîş de do serbikewê û peynîya nê zulmî bîyarê. Ma azadîya tepişteyanê xo wazenê û aştî wazenê. Ma aştî û têduştî wazenê. Ma nêwazenê  şer virazîyo. Tewr zêde zerrîya dayîkan veşena.” 

 

‘Ma weşîye û azadî gêrenê’

 

Sûre Pusat, dîyar kerd ke dayîkî nêwazenê êdî gonî bêra rijnayîş û wina vat: “Dayîkî şer nêwazenê. Aramîyêke nê welatî ra lazim a. Ma weşî û azadîye gêrenê. Ma nêwazenê tu kurdêk bêro tepiştiş û bêro kiştiş. Wa êdî tu dayîke nêberma.” 

 

‘Yewîye, serkewtiş û azadî’

 

Tewr peyîn zî Huzel Kocaman qisey kerd û vat: “Ma dayîkê şehîdan ê û zerrîya ma veşena. Dinya zilmê serê kurdan temaşe kena. La kurdî çarenusê xo bi xo bivurnê. Ne şer, ne pêrodayîş, ne zî zilm. Veng û zerrîya ma bi yewîye, serkewtiş û azadî rê şino.”