Rozerîn Gultekîn

 

STENBOL - Endama MYKyî ya Partîya Çep a Keske Çîgdem Ozbaşe dîyar kerd ke şar bi wayîrvejîyayîşê partîye mesajê ‘Ma bêçareserî nîyê’ dayo îqtîdar û wina vat: “Yê ke do nê îqtîdarî bişirawê cinî yê. Serkewtiş do yê cinîyan bo. Ma nê weçînayîşî de bi qerardarî ke îqtîdarî bişirawê serê eşteyê tarîxî.”

 

Partîya Demokratîke ya Şaran (HDP) tehlukeyê girewtişê partiye vera qerar da ke bi Partîya Çep a Keske reyde dekewa weçînayîşê serekkomarî û pêroyî ke do 14ê Gulane de pê bêro. Partîya Çep a Keske 30ê Adare de beyannameyêk weşana û dîyar kerd ke do bi sloganê ‘Reyna ma’, ‘Ma tîya de yê ma do pîya bibedilê’ şêrî weçînayîşî. Partîya Çep a Keske hetê şaran ra bi coşêk gird ameye pêşwazîkerdiş. Bi mîlyonan kesî raşteyê Newroze de dîyar kerdî ke do îqtîdarê AKP-MHPyî bi Partîya Çep a Keske bişirawê.

Endama Heyetê Rayîrberî ya Merkezî (MYK) ya Partîya Çep a Keske Çîgdem Ozbaşe derheqê xebatê weçînayîşî û muhîmîya weçînayîşî de qisey kerd.

 

'Ma bi qeradardarê ke îqtîdarî bişirawî serê eşteyê tarîxî!’

 

Çîgdeme dîyar kerd ke zîhnîyetê dewleta otorîtere 20 serrî yo ezîyetê cîyayan bi şarî dayo antiş û coka ra zî seba ke îqtîdarî têk bibî bi serrano têkoşîn danî. Çigdeme wina dewam kerd: “Ma îqtîdarî weçînayîşê 7ê Hezîrane de têk berd la bi hawayêk teberêhuqûqî 1ê Teşrîna Peyêne de reyna ame. Ma di serrî verê cû kongreye xo de lazimîyê cepheyê demokrasîye da çiman ver. Seba weçînayîşî ma dest bi xebatan kerd. Ma yew serrî de xo resna. Seba ke HDPyî nêro girewtiş ma Partîya Çep a Keske amade kerd. Ma nika bi Partîya Çep a Keske şinê weçînayîş. La ma HDPyî zî nêdanê girewtiş.”

 

'Şar beyraqa ma wedarit’

 

Çîgdeme bale ant amacê partîye ser û nê çîyan vat: “Amacê Partîya Çep a Keske bi ya HDP û HDKyî reyde eynî yo. Temsîlkarê seyyewbînan, rayîrberîya xoser û rêzdarîya hemverê xozaye esas gêno. Sozê ke seba şarî ameyî dayîş Metnê Progmatîk ê partîye de sey ‘4 edalet’ ameyî mojnayîş. Edaletê naskerdişî, edaletê dorme, edaletê awhewayî û edaletê îktîsadî. Çîyo ke HDPyî pêşnîyar kerdbî, berardişê zaf pêameye û zaf tîfaqî bî. Ma bi vatişê ‘Beyannameyê weçînayîşî do bibo beyannameyê cepheyê demokrasîye’ Metnê Progmatîk eşkera kerd. Şar demêk kilm de wayîrê partî û xebatan vejîya. Seba şarî bî hêvî. Nimuneyêk ver bi çiman Newroze de ame dîyîş.”

 

‘Yê ke îqtîdar bierşawê cinî yê’

 

Çîgdeme dîyar kerd ke bi sîyasetêk ke heqê cinîyan xozayî yo û cuye pawenê şinê weçînayîşê 2023ine û dîyar kerd ke îqtîdarê AKP-MHPyî û partîyê bînî yê tifaq de ca gênê, dişminîyê cinî kenê û nê ser de sîyaset kenê. Çîgdeme wina vat: “Yê ke îqtîdar bierşawê do cinî bê. Cinî hemverê îqtîdarê ke dişminîyê cinîyan keno, heqê înan xesp keno, derheqê înan de qerar dano do serkewtişêk pîl bi dest bikero. Serkewtiş ê cinîyan o. Partîya Çep a Keske ke xeylêk pêameyê ci estê, amanc kena ke profîlê parlamenterî ke heme hetî hewênena, awan bikera. Bi taybetî bi cinîyan reyde têkilî de ya û lîsteyêk namzedî ke cinîyan temsîl kena awan kena.”

 

Mesajo zelal: Ma do pîya bi dest bikerê

 

Çîgdeme tewr peyîn de dîyar kerd ke do kampanyaya weçînayîşî bi vurnayîşêk pîl pê bîyarê û no proses xeylêk muhîm o. Çîgdeme wina vat: “Ma do berêk newe awan bikerê. Bi paştdayîşê ke bêro dayîş, ma do vernîya şîdetî, bêtêduştîya hemverê cinîyê karker û xoza de vinderê. Meclîsê partîya ma bi bawerîya tifaqê xo, cinî, ciwan û tevgerê ekolojî rê mesajê ‘ma do pîya serbikewê’ dayî. Çareserî destê muxalefetê komelî de yo. Ez veng dana ke pêro kesî binê Partîya Çep a Keske de bêrê têhet.”