WAN - Cinîyan dîyar kerd ke ganî bi lez tecrîdê serê Rayberê PKKyî Abdullah Ocalanî ke di serrî yo ci ra xebere nîna girewtiş bêro wedaritiş û vat: “Heta ke ma bibî ma do kişta serekatîyê xo de bê.”

 

Tecrîdo girankerde yê serê Rayberê PKKyî Abdullah Ocalanî dewam keno û di serrî yo ke ci ra xebere nîna girewtiş. Şar fikarin o û tecrîd her ke şino vilayê pêroyê zîndanan û raşteyê cuye beno. Cinîyan seba weçînayîşo ke do Gulane de pê bêro vejîyayî raşteyan û vatî ke ganî tecrîd bêro wedaritiş. 

 

Weçînayîşî rê demêk kilm mend û akerdişê buroyê Partîya Çep a Keske sey mîtîngî derbaz beno. Cinîyê ke tewrê akerdişê buroyan benê azadîya Rayberê PKKyî Abdullah Ocalanî wazenê. 

 

Cinîyê ke ajansê ma rê qisey kerdî reaksîyonê xo yê hemverê tecrîdî ardî ziwan. 

 

Sîyanet Kamaçe da zanayîş ke derdê înan Abdullah Ocalan o, derdê înan ziwanê înan o û vat: “Ganî sere de tepişteyê sîyasî serberst bêrê verdayîş. Ma nêwazenê gonî birija. Ma wazenê ser bikewê. Ma ziwanê xo wazenê. Şarê Tirk senî leşkeranê xo ra hes keno ma zî serekatîyê xo ra hes kenê. Ma ziwanê xo hes kenê. Kurdî koyan de yenê qetilkerdiş. Ma nêeşkenê cenazeyê şehîdanê xo bigêrê. ma zî estê, ma zî merdim ê.”

 

‘Heta peynî ma bi Ocalan reyde yê’ 

 

Sîyanete bale ant operasyonan ser û reaksîyonê xo wina ard ziwan: “Tutê ma yenê qetilkerdiş. Hemverê ma şer kenê. Vernîya ma de benê astengî. Abdullah Ocalan 24 serrî yo tepişte yo. Ma wazenê bi lez pêvînayîş bêro kerdiş. Wa keye, avûkat û parlementerî şêrî pêvînayîş. Ma heta bibî ma kişta serekatîyê xo de yê.”

 

‘Wa Abdullah Ocalan bêro veradayîş’

 

Hatim Hatman zî dîyar kerd ke sere de cinî û ciwanî ganî komel hemverê tecrîdî de wurzo serê payan û vat: “Ma azadîye wazenê. Wa Abdullah Ocalan bêro veradayîş. Wa şarê ma azad bibo. Wa cinî û ciwanî wurzê serê payan. Wa her kes wurzo serê payan. Ganî ma dest bidê yewbînan. Ma do serbikewê. Biciwîyo Azadî û Abdullah Ocalan.”

 

‘Ma do keyanê xo de nênişnê ro’

 

Leyla Buge zî wina reaksîtonê xo ramojna: “Ma seba rewşa Abdullah Ocalanî endîşeyîn ê. Zîndanan de tepişteyî dinyaya xo bedelnenê. Ganî dayîkî wurzê serê payan. Tutanê înan gênê erzenê zîndanan. Zîndanan de dinyaya xo bedelnenê. Xemê kesî nîyo. Serê nê însanan de tecrîd pê yeno. Tepişteyê nêweşî nînê veradayîş. Gelo ma do heta key keyeyê xo de ruşê? Êdî bes o. Wa dayîkî wurzê serê payan. Wa kes keyeyê xo de nênişno ro.”