ANQARA - Îtîfaqê Kede û Azadîye metnê xo yê tewir û mutebeqatî eşkera kerd. Îtîfaqî da zanayene ke Partîya Çep a Keske do 81 şaristanan de bikewa weçînayîşî.

 

Îtîfaqê Kede û Azadîye metnê xo yê tewir û mutebeqatî Anqara de bi kombîyayîşêkî eşkera kerd. Hemvervatoxê Partîya Çep a Keske Îbrahîm Akin, Hemserekê HDPyî Mîthat Sancar, Serekê TÎPî Erkan Baş, Serekê Partîya Têgêrayîşê Kedkarî (EHP) Hakan Ozturk, Federasyonê Meclîsanê Sosyalîstan ra Bariş Kayioglu, TOPî ra Perîhane Koca û Serekê EMEPî Ercument Akdenîz zî tewrê kombîyayîşî bîyî.

 

Îbrahîm Akinî metnê tewir û mutebeqatî yê weçînayîşî eşkera kerd. Îbrahîmî îfade kerd ke înan 22yê adare de derheqê weçînayîşê serekkomarîyende metnê xo yê tewir û mutebeqatî eşkera kerdbî û oyo ewroyîn zî metnê serê weçînayîşanê wekîlan o. Îbrahîmî ard ziwan ke weçînayîşanê wekîlan de zî hedefê înan o verên çinkerdişê rejîmê tekperestî yo.

 

Metnê pêkerdişê polîtîkî de wina ame vatiş: 

 

“Îtîfaqê Ked û Azadîye sey weçînayîşê Serekkomarîye, weçînayîşê parlamenterî de zî amanc keno ke rejîmê yew merdimî peynî bikero. Îtîfaqê ma yê awankerdişê ameyoxê demokratîke ya Tirkîya amanc keno do weçînayîşan paştdayîşêk pîl ê şarî bigîro, hetê kede, aştîye, demokrasî ra temsîlkarê meclîsî yê bihêz bi dest bikero.

 

EHP, EMEP, HDP, SMF û TOP 81 şaristanan de Partîya Çep a Keske reyde do bikewê weçînayîşî la TÎP 49 şaristanan û 52 dormeyê weçînayîşî de bi sereyê xo do bikewo weçînayîşî.

 

Pêro herêmê weçînayîşî ameyî cigêrayene, serkewtişê weçînayîşanê HDPyî yê verênî ameyî esaskerdene û yew  hedefê serkewtişî ame dîyarkerdene. Ma armanc kenê ke bi mutebeqatê xo yê weçînayîşî, kampanyayêka xurte bikerê. Bi na bira xo ma hêvî kenê  ke Îtîfaqê Kede û Azadîye weçînayîşan de do ser bikewo û rejîmê tekperestî bin bivisno. Pêro cinî, kedkar, ciwan û şarê ma rê bixêr bo. Ma do pîya ser bikewê. Şarê ma do ser bikewê.”